Askofu Dk. Mokiwa aipongeza Mahakama Kuu

Askofu mpya wa Tatu wa Kanisa la Anglikani Tanzania Dayosisi ya Mount Kilimanjaro (DMK), Askofu Stanley Hotay akisaini hati ya kiapo mbele ya Askofu Mkuu wa Kanisa la Anglikana Tanzania Askofu Dk. Valentino Mokiwa katika ibada maalum ya kumsimika iliyofanyika Jijini Arusha Septemba 9, 2012. 

Na Father Kidevu Blog, Arusha

HATIMAYE Askofu Stanley Hotay ameapishwa rasmi kuwa Askofu wa Dayosisi ya Mount Kilimanjaro (DMK), baada ya Mahakama Kuu Kanda ya Arusha kuifuta kesi iliyokuwa inapinga kuapishwa kwake. 

Kesi hiyo ilifunguliwa na waumini watatu wa Kanisa hilo ambao ni Looti Oilefu, Godfrey Muhone na Frank Jacob.

Akizungumza katika Ibada ya kumuapisha na kumuweka kitini Askofu Hotay, Askofu Mkuu wa Kanisa la Anglikana Tanzania, Askofu Dk. Valentino Mokiwa kwanza alipongeza Mahakama kwa kumpa Kristo Yesu haki yake.

Mbali na kuipongeza Mahakama Kuu Askofu Mokiwa alimpongeza Jaji Fatuma Masengi kwa kutoa hukumu iliyoleta heshina na amani ndani ya Kanisa.

“Ninamshukuru Mungu kwa Jaji kutoa hukumu hii, Mungu amuongezee siku za kuishi na Mungu amlinde kama Rais Jakaya Kikwete ananiskia alipo namuomba amuongezee cheo,”alisema Askofu Mokiwa.

Hata hivyo akizungumzia kuhusu hatima ya waumini hao na mtazamo wa washirika Askofu Mokiwa alitangaza msimamo wa kuwasamehe na kuwataka kurejea kundini kuendelea kufanya kazi ya Mungu. 

Kwa upande wake Askofu mpya Hotay akizungumza kabla ya kumkaribisha mgeni rasmi Mkuu wa Mkoa wa Arusha Magessa Mulungo, alianza kwa kumshukuru Mungu kwa uamuzi uliotolewa na Mahakama Kuu ya Tanzania.

"Ninafsi natangaza kuwasamehe kwani walikuwa hawajui walitendalo ndani ya Kanisa la Kristo Yesu," alisema Askofu Hotay.

Naye mgeni rasmi katika Iabada hiyo RC Mullongo alijikuta akigeuka muhibisi na kuwaeleza waumini hao kwamba hakika Yesu Kristo ameshinda.

“Hili tukio la kuapishwa kwa Askofu Hotay Serikali tunaliheshimu sana, tumepata faraja kubwa kwani kama msingetanguliza amani leo haki mliyopata mahakamani msingeiona haki ya leo.

“Mliendelea kuwa watulivu hakumfanya maandamano mlikaa kimya na kumtanguliza Mungu. Lakini wapo wapo wanaojidanganya eti ni lazima uvuruge amani ili upate haki wakati si kweli.

“Sasa leo nimekuja hapa kuwauliza tunagombea nini, kinachofanya tutangaze nje kwamba hatuelewani ni nini? Kwangu mimi huo ni uroho tu. Ndani ya Serikali tunasema Askofu Hotay unastahili na tutakunga mkono,” alisema Mulongo.

Akizungumzia kuhusu umuhimu wa kutanguliza maadili na nidhamu kwa viongozi wa dini, Mulongo alibainisha kuwa Taifa ambalo wananchi wake wameandaliwa vizuri kiroho siku zote huwa inakuwa kazi rahisi kwa Serikali iliyopo kufanya kazi zake kwa amani.

Wiki iliyopita Mahakama Kuu Kanda ya Arusha iliyatupilia mbali maombi yalifunguliwa na waumini watatu wa Dayosisi hiyo wakidai Askofu Hotay hakuwa na sifa za kuchaguliwa.

Hata hivyo katika uamuzi uliotolewa na Jaji Masengi alidai walalamikaji katika shauri hilo hawakuwa na hoja za msingi za kupeleka shauri hilo mahakamani badala ya kulipeleka kwenye ngazi na taratibu za Kanisa kwani Kanisa hilo linayo Katiba yake inayoliongoza.

Kufutwa kwa kesi hiyo sasa kulitoa nafas ya kukamilisha baadhi ya taratibu za Kiangalikana ambazo hazikufanyika katika kumkabidhi Askofu Hotay Dayosisi ikiwamo kula kiapo na kukalishwa kitini.