AJIRA 5,000 KUPATIKANA KUPITIA KONGANI YA VIWANDA RUVUMA

SONGEA, RUVUMA

Mkuu wa Mkoa wa Ruvuma, Brigedia Jenerali Ahmed Abbas Ahmed, amesema mradi wa Kongani ya Viwanda unaotekelezwa na mwekezaji Hongwang Tanzania Holdings wilayani Songea, mkoani Ruvuma, unatarajiwa kutoa ajira 5,000 kwa Watanzania.

Amesema hayo Oktoba 23, 2026, wakati wa ziara ya Waziri wa Nishati, Mhe. Dkt. Juma Zuberi Homera, katika eneo la mradi huo unaohusisha uzalishaji wa megawati 2,000 za umeme kwa kutumia vyanzo mbalimbali, ikiwemo makaa ya mawe, pamoja na viwanda vya aluminium na chuma.

Brigedia Jenerali Ahmed amesema mradi huo unagharimu dola za Marekani bilioni 3, sawa na takribani Sh trilioni 7.8, na unatarajiwa kuwa chachu ya maendeleo ya kiuchumi mkoani Ruvuma kupitia fursa za ajira, uwekezaji na kuimarika kwa upatikanaji wa umeme nchini.

Ameeleza kuwa sehemu ndogo ya umeme utakaozalishwa itatumika katika shughuli za viwanda vilivyopo ndani ya kongani hiyo, huku sehemu nyingine ikiuzwa kwa Shirika la Umeme Tanzania (TANESCO) na kuingizwa katika gridi ya taifa. Aidha, mwekezaji ameanza ujenzi wa miundombinu ya kusafirisha umeme kwenda kituo cha kupokea umeme kilichopo Songea mjini.

 Ameongeza kiwa mradi huo ni wa kimkakati kwa Ruvuma na utasaidia kupanua fursa za ajira na uwekezaji. Ameipongeza Serikali kwa kuweka mazingira yanayovutia wawekezaji na kuwataka wananchi wa mkoa huo kuwa walinzi wa miradi ya kimkakati, huku akivitaka vyombo vya ulinzi na usalama kuendelea kuhakikisha usalama wa miradi na rasilimali zinazotumika.

Kwa upande wake, mwakilishi wa Hongwang Tanzania Holdings amesema umeme utazalishwa kwa kutumia vyanzo mbalimbali, ikiwemo makaa ya mawe, huku kampuni ikiahidi kuzingatia miongozo ya mazingira na viwango vya kimataifa katika utekelezaji wa mradi huo.

NAIBU WAZIRI LONDO AAHIDI KUFUATILIA CHANGAMOTO ZA VIWANDA KUKUZA UZALISHAJI WA NDANI

Kibaha, Pwani.

Naibu Waziri wa Wizara ya Viwanda na Biashara, Mhe. Dennis Londo (Mb), amefanya ziara katika viwanda vya  Insignia limited Coral Paint na  Kiwanda cha kuzalisha Ethanol cha Mara Nile vilivyoko Kibaha mkoa wa Pwani, kwa lengo la kujionea shughuli za uzalishaji kwenye Kongani zilizopo mkoa wa Pwani na kusikiliza changamoto na namna ya kuzitatua.

Akiwa kwenye  kiwanda cha Insignia sambamba na Mkuu wa wilaya ya Kibaha aliyeambatana nae, Bwana Fadhili Nkurlu pamoja na wadau mbalimbali Mhe. Londo amesema, 

Serikali inaendelea kuhamasisha ujenzi wa viwanda vipya pamoja na kutembelea viwanda vilivyopo ili kubaini changamoto zinazokwamisha uzalishaji na kuzitafutia ufumbuzi. 

Amesema Mkoa wa Pwani una nafasi muhimu katika kukuza sekta ya viwanda kutokana na fursa zake za uwekezaji na umuhimu wake katika shughuli za kiuchumi na kumpongeza mwekezaji wa kiwanda hicho kupitia Mkurugenzi wake Bwana Isack Kiwango kwa kupanua uwekezaji kwenye uzalishaji wa rangi pamoja na bidhaa za vifungashio.

Kiwanda cha Insignia, ambacho kilianza shughuli zake Temeke kabla ya kuhamia Kibaha, kinajishughulisha na uzalishaji wa rangi pamoja na bidhaa za vifungashio vya plastiki na chuma. Kwa upande wake, mkurugenzi wa kiwanda hicho, Bwana Isack, amesema kiwanda kina matarajio ya kupanua shughuli zake na kutoa ajira zisizopungua 1,000, huku akiomba Serikali kusaidia kutatua changamoto za miundombinu, hususan barabara zinazohudumia maeneo ya viwanda.

Akiwa katika kiwanda cha kutengeneza Ethanol cha Mara Nile, Mhe. Londo amesema kiwanda hicho kinatatarajia kuleta mapinduzi kwenye kilimo kupitia Teknolojia ya kuzalisha ethanol kwa kutumia mahindi na hivyo kuongeza matumizi ya mahindi katika shughuli za viwandani, ikiwemo uzalishaji wa ethanol. 

Akitoa majumuisho ya ziara hiyo Mhe Londo amesema  pia  mahitaji ya mahindi yataongezeka kwasababu ya matumizi ya viwanda na hivyo zao hilo kuongezeka thamani na kusisitiza umuhimu wa kutafuta matumizi na masoko mbalimbali ya mahindi ili kuongeza thamani ya zao hilo na kupanua fursa za kibiashara kwa wakulima. 

Akizungumza katika Ofisi ya Mkuu wa Wilaya ya Kibaha, Mhe. Londo amesisitiza umuhimu wa kuhakikisha leseni zinazotolewa kwa viwanda zinaendana na shughuli halisi zinazofanyika. Amesema ni muhimu kufuatilia viwanda vinavyopewa leseni za uzalishaji kamili lakini katika utekelezaji wake vinafanya shughuli za kuunganisha bidhaa pekee, ili kuhakikisha shughuli za viwanda zinaendana na madhumuni ya leseni zao.

Kwa upande wake, Mkuu wa Wilaya ya Kibaha, Fadhili Nkurlu, amesisitiza umuhimu wa ushirikiano kati ya Serikali na wadau wa sekta binafsi katika kuboresha mazingira ya uwekezaji na kutatua changamoto zinazokabili wafanyabiashara na wawekezaji.

Ziara hiyo ni sehemu ya maandalizi ya uzinduzi wa Sera ya Maendeleo Endelevu ya Viwanda ya mwaka 2025 na Sera ya Maendeleo ya Wajasiriamali Wadogo na wa Kati, Toleo la 2025, unaotarajiwa kufanyika Novemba 4, 2026. Sera hizo zinalenga kutoa mwelekeo wa maendeleo ya viwanda na kukuza shughuli za wajasiriamali nchini.

TANESCO KUIWEZESHA KAMPUNI YA HWTZ MEGAWATI 200 KUTEKELEZA MRADI WA UZALISHAJI UMEME

Waziri wa Nishati Mheshimiwa Dkt. Juma Homera amesema Shirika la umeme Tanzania TANESCO linatarajia kuingia makubaliano na muwekezaji kutoka  Kampuni ya Hongwang Tanzania Holdings (HWTZ ) kutoka China  kumpatia  jumla ya Megawati 200, kwa ajili ya ujenzi wa Mradi mkubwa wa kuzalisha zaidi ya megawati 2,000 za umeme kwa kutumia makaa ya Mawe na nishati ya jua Mkoani Ruvuma.

Akizungumza Oktoba 23, 2026 wakati wa ziara yake katika kongani ya viwanda inayojihusisha na uwekezaji wa ujenzi wa mradi wa uzalishaji Umeme, Kiwanda cha  Alminium pamoja na  Chuma , Waziri Homera ametoa rai kwa TANESCO kuharakisha mchakato wa kuingia makubaliano ili mradi huo uanze kutekelezwa kwa haraka kwa maslahi mapana ya wananchi wa Mkoa wa Ruvuma na maeneo jirani.

Amesema Mradi huo unatakelezwa kwa gharama ya shilingi trilioni 7.8 ukitarajia kuzalisha zaidi ya megawati 2,000 za umeme ukipishana kidogo na  Kituo cha kuzalisha umeme cha Julius Nyerere kinachozalisha  jumla ya megawati 2115.

‘’ Tumeelezwa Mradi huu utakuwa wa kwanza Barani Afrika, natoa rai kwa TANESCO kuharakisha mazungumzo na muwekezaji ili kuwapatia megawati 200, ili kuanza ujenzi wa mradi wa kuzalisha umeme unaoratajia kuzalisha zaidi ya megawati 2,000 za umeme kwa kutumia makaa ya mawe na nguvu ya jua ili kuchochea shughuli za uzalishaji na fursa za kijamii’’, Alisisitiza Waziri Homera.

Kwa upande wake Mkuu wa Mkoa wa Ruvuma Brigedia Generali Ahmed Abbas ameishukuru Serikali chini ya Uongozi wa Rais Dkt Samia Suluhu Hassan kwa kuweka mazingira mazuri ya kuvutia uwekezaji ambapo umeme utakaozalishwa katika kongani hiyo utachochea fursa za ajira kwa vijana na shughuli nyingi za uzalishaji zitaongezeka hivyo kuongeza pato la Serikali.

‘’Tunamshukuru Sana Mhe. Rais Dkt Samia Suluhu Hassan kwa kuweka mazingira mazuri ya uwekezaji, sasa Kongani hii ya viwanda ambayo pia itakuwa na mradi wa kuzalisha umeme zaidi ya megawati 2,00O utaifanya Ruvuma kuwa miongoni mwa mikoa yenye miradi mikubwa ya kimkakati inayoongeza fursa nyingi za kijamii na kiuchumi pamoja na ajira zaidi ya 5,000 kwa vijana’’ Alieleza Brigedia Generali Abbas

Akizungumza kwa niaba ya Mkurugenzi Mtendaji wa TANESCO, Naibu Mkurugenzi Mtendaji wa TANESCO anayeshughulikia Mipango, Utafiti na Uwekezaji Mha. Amos Kaihula amesema kuwa kwa sasa TANESCO iko katika hatua za mwisho za mazungumzo za kusaini makubaliano ya kuwapatia  jumla ya megawati 200 ili muwekezaji aanze mchakato wa ujenzi wa mradi huo muhimu ambapo ukikamilika Muwekezaji huyo ataiuzia TANESCO sehemu ya umeme atakao zalisha.

Mradi huo wa kuzalisha umeme kwa kutumia makaa ya Mawe na nguvu ya Jua Mkoani Ruvuma unatarajiwa  kujengwa na muwekezaji kutoka kampuni ya HWTZ chini ya Kampuni mama ya HWHG kutoka China.

SERIKALI YAKUTANA NA KAMPUNI ZA CHINA KUJADILI UWEKEZAJI KATIKA MAFUTA, GESI ASILIA NA NISHATI JADIDIFU

Naibu Waziri wa Nishati, Mhe. Salome  Makamba, amekutana na kufanya mazungumzo na viongozi wa kampuni mbili kutoka China kwa lengo la kujadili  uwekezaji katika sekta ya nishati nchini, hususan katika shughuli za utafutaji wa mafuta na gesi asilia, ujenzi wa miundombinu ya gesi pamoja na miradi ya nishati jadidifu.

Katika kikao kilichofanyika Oktoba 23, 2026, katika Ofisi ndogo za Wizara ya Nishati, Dar es Salaam,

Mhe. Salome amefanya mazungumzo na Mkurugenzi wa Kampuni ya ChuanQing Drilling Company, Bw. Liu Chang Xu, yaliyolenga kujadili fursa za uwekezaji katika shughuli za utafutaji wa mafuta na gesi asilia, ujenzi wa miundombinu katika mkondo wa chini wa sekta ya petroli pamoja na miradi ya nishati jadidifu, hususan nishati ya jua na jotoardhi.

Pia, Mhe. Salome amezungumza na Mwenyekiti wa Kampuni ya Kwala Industries, Bw. Janson Huang, kuhusu hatua iliyofikiwa katika utekelezaji wa mradi wa ujenzi wa bomba la kusafirisha gesi asilia kutoka Kinyerezi, Dar es Salaam, hadi Chalinze mkoani Pwani, unaoendelea kusimamiwa na Shirika la Maendeleo ya Petroli Tanzania (TPDC).

Mradi huo unatarajiwa kuwezesha upatikanaji wa gesi asilia kwa ajili ya matumizi ya viwanda katika eneo la Chalinze na maeneo jirani, hatua itakayochochea uwekezaji na kukuza shughuli za kiuchumi.

Vikao hivyo vimehudhuriwa pia na Katibu Mkuu wa Wizara ya Nishati (Mafuta na Gesi), Dkt. James  Mataragio, pamoja na wataalam kutoka Shirika la Maendeleo ya Petroli Tanzania (TPDC).

TAASISI 2,682 ZAANZA KUTUMIA NISHATI SAFI YA KUPIKIA, SERIKALI YALENGA TAASISI 30,000

Mbeya,

Wizara ya Nishati imetoa elimu kuhusu Mkakati wa Taifa wa Matumizi ya Nishati Safi ya Kupikia kwa wajumbe wa Baraza la Wafanyakazi wa Sekretarieti ya Maadili ya Viongozi wa Umma, katika mkutano uliofanyika Oktoba 22, 2026, jijini Mbeya.

Akitoa mafunzo hayo, Mhandisi Benezeth Kabunduguru kutoka Kitengo cha Nishati Safi ya Kupikia, Wizara ya Nishati, amesema jumla ya taasisi 2,682 zimeanza kutumia nishati safi ya kupikia kati ya taasisi 30,000 zinazolengwa na Serikali.

Amesema Serikali inalenga kuhakikisha asilimia 80 ya Watanzania wanatumia nishati safi ya kupikia ifikapo mwaka 2034, kupitia Mkakati wa Taifa wa Matumizi ya Nishati Safi ya Kupikia uliozinduliwa na Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, Mei 8, 2024.

Mhandisi Kabunduguru ameeleza kuwa matumizi ya kuni na mkaa yanaweza kusababisha athari za kiafya kutokana na moshi unaozalishwa wakati wa kupikia, sambamba na kuchangia uharibifu wa misitu na mazingira. Amebainisha kuwa nishati safi za kupikia ni pamoja na umeme, gesi oevu (LPG), gesi asilia, gesi vunde, bayoethanoli, mkaa mbadala, nishati ya jua na hidrojeni.

Aidha, amesema matumizi ya nishati safi ya kupikia yana manufaa ya kiafya, kimazingira na kiuchumi, ikiwemo kupunguza muda unaotumika kutafuta kuni, kuhifadhi misitu na kuwawezesha wanawake na watoto kutumia muda mwingi katika shughuli za uzalishaji na masomo.

Ameeleza kuwa Serikali inaendelea kutekeleza hatua mbalimbali za kuhamasisha matumizi ya nishati safi ya kupikia, zikiwemo kusambaza majiko na mitungi ya gesi kwa ruzuku, kuimarisha miundombinu ya gesi asilia na kuhamasisha matumizi ya majiko ya umeme.

Vilevile, amesisitiza umuhimu wa taasisi zinazohudumia zaidi ya watu 100 kwa siku kuhamia kwenye matumizi ya nishati safi ya kupikia. Amewataka viongozi na watumishi wa umma kuwa mabalozi wa matumizi ya nishati hiyo katika maeneo yao ya kazi na jamii zinazowazunguka ili kuchangia kufanikisha lengo la Serikali la kuhakikisha asilimia 80 ya Watanzania wanatumia nishati safi ya kupikia ifikapo mwaka 2034.

Kwa upande wake, Jaji Mstaafu, Mheshimiwa Sivangilwa Sikalalilwa Mwangesi, ameishukuru Wizara ya Nishati kwa kutoa mafunzo hayo, akieleza kuwa elimu kuhusu matumizi ya nishati safi ya kupikia ni muhimu katika kuongeza uelewa na kuhamasisha mabadiliko ya matumizi ya nishati katika taasisi na jamii.

SERIKALI YAZIPA TAASISI MSUKUMO KUFUNGA MIANYA YA UPOTEVU WA MAPATO YASIYO YA KODI

Naibu Katibu Mkuu, Wizara ya Fedha, Bw. Elijah Mwandumbya akifungua kikao cha ngazi ya wataalam cha Mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Mkurugenzi Msaidizi, Ofisi ya Msajili wa Hazina Bw. Joseph Mwaisemba, akifanya wasilisho kuhusu taarifa ya makusanyo ya mapato yasiyo ya kodi wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Meneja wa Mfuko wa Maendeleo ya Kilimo, Wizara ya Kilimo, Bi. Maria Mtui, akifanya wasilisho kuhusu ukusanyaji wa mapato yasiyokuwa ya kikodi katika Sekta ya Kilimo, wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square. 

Farida Radhaman na Josephine Majura, WF, Dodoma

Serikali imeziagiza taasisi zote zinazohusika na ukusanyaji wa mapato yasiyo ya kodi kuimarisha mifumo ya ukusanyaji, usimamizi na ufuatiliaji wa fedha ili kuhakikisha kila shilingi inayostahili kukusanywa inaingia katika mifumo rasmi ya Serikali na kusaidia kugharamia huduma za jamii pamoja na miradi ya maendeleo.

Wito huo umetolewa jijini Dodoma na Naibu Katibu Mkuu, Wizara ya Fedha, Bw. Elijah Mwandumbya, wakati akifungua kikao cha wataalum cha mafungu yanayohusika na ukusanyaji wa mapato yasiyo ya kodi, kwa lengo la kupitia taarifa za makusanyo, kujadili changamoto na kuandaa mapendekezo yatakayosaidia kuboresha usimamizi wa mapato ya Serikali.

Bw. Mandumbya alisisitiza kuwa kuongeza viwango vya tozo au kubaini vyanzo vipya vya mapato pekee hakutoshi bila kuimarisha mifumo ya ukusanyaji na kudhibiti mianya ya upotevu wa fedha za umma.

“Ni muhimu kuhakikisha kila shilingi inayostahili kukusanywa na Serikali inaingia katika mifumo rasmi. Tunapaswa kuimarisha usimamizi na ufuatiliaji wa mapato ili kuzuia upotevu wa fedha ambazo ni muhimu katika utekelezaji wa mipango ya Serikali na utoaji wa huduma kwa wananchi,” alisisitiza Bw. Mwandumbya.

Alisema kuwa juhudi za kuongeza mapato zinapaswa kuzingatia hali halisi ya uchumi na kulinda mazingira yanayowawezesha wananchi kufanya shughuli halali za kiuchumi.

Aliongeza kuwa ukusanyaji wa mapato yasiyo ya kodi ni jukumu la pamoja linalohitaji ushiriki wa taasisi zote katika hatua za upangaji wa makadirio, utekelezaji, ufuatiliaji na tathmini huku akiwasihi kutumia kikao hicho kuweka maazimio yenye mikakati inayotekelezeka, majukumu yaliyo wazi na utaratibu madhubuti wa kufuatilia matokeo.

“Lengo letu si kuongeza mapato pekee, bali pia kuhakikisha hakuna fedha zinazopaswa kuingia Serikalini zinazopotea kutokana na udhaifu wa mifumo au usimamizi usioridhisha. Kila taasisi inapaswa kutekeleza wajibu wake na kuhakikisha maazimio yanayokubaliwa yanafuatiliwa hadi kuleta matokeo,” alieleza Bw. Mwandumbya.
 
Alisema Takwimu za makusanyo ya mwaka wa fedha 2025/26 zinaonesha kuwa mchango wa mapato yasiyo ya kodi unatofautiana kwa kiasi kikubwa kati ya taasisi za Serikali, huku baadhi zikichangia sehemu kubwa ya mapato na nyingine zikiwa na mchango mdogo.

Bw. Mwandumbya alisema takwimu hizo zinaonesha umuhimu wa taasisi zenye mchango mdogo kupitia upya mikakati yao na kujifunza kutoka kwa taasisi zinazofanya vizuri.

“Bado kuna fursa nyingi za mapato ambazo hazijafikiwa kikamilifu. Ni muhimu kwa kila taasisi kubaini fursa hizo na kuimarisha usimamizi ili kuongeza mchango wake katika mapato ya Serikali,” alisisitiza Bw. Mwandumbya.

Bw. Mwandumbya alisema pamoja na changamoto hizo, mapato yasiyo ya kodi yameendelea kuonesha ongezeko. Katika kipindi cha Julai hadi Agosti cha mwaka wa fedha 2026/27, Serikali ilikusanya shilingi trilioni 1.06 sawa na ufanisi wa asilimia 114.7 ya lengo la kipindi hicho.

Alisema makusanyo hayo yanaonesha ukuaji wa asilimia 34.4 ikilinganishwa na kipindi kama hicho mwaka 2025, na kubainisha kuwa katika mwaka wa fedha 2025/26, Serikali ilikusanya shilingi trilioni 4.3175 kati ya lengo la shilingi trilioni 4.682, sawa na ufanisi wa asilimia 92.2.Mkurugenzi wa Idara ya Usimamizi wa Mifumo ya Fedha na Tehama, Wizara ya Fedha, Dkt. John Sausi, akitoa maelezo mafupi wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Kwa upande wake, Mkurungenzi wa Idara ya Mipango wa Wizara ya Fedha, Bw. Amoury Amoury ambaye alitoa maelezo ya awali kuhusu kikao hicho kwa niaba ya Kamishna wa Idara ya Uchambuzi wa Sera, Wizara ya Fedha, Dkt. Remidius Ruhinduka, alisema katika kikao hicho, washiriki watapata fursa ya kutathmini utekelezaji wa maazimio ya kikao kilichopita pamoja na kujadili mwenendo wa ukusanyaji wa mapato yasiyo ya kodi na usajili wa vyanzo vya mapato.

Alisema kikao hicho kililenga kupata mapendekezo ya kitaalamu yanayosisitiza umuhimu wa kuimarisha usimamizi wa vyanzo vilivyopo, kubaini fursa mpya za mapato na kuongeza uelewa wa wadau kuhusu taratibu za usajili, ili kuboresha usimamizi na ukusanyaji wa mapato yasiyo ya kodi kwa kusaidia kupanua wigo wa ukusanyaji wa mapato na kuongeza mchango wa mapato yasiyo ya kodi katika kugharamia shughuli za Serikali na miradi ya maendeleo.

Naye Mkurugenzi wa Mifumo ya Usimamizi wa Fedha na Huduma za Tehama, Dkt. John Sausi alielezea hatua mbalimballi zinazofanywa na Serikali kupitia Wizara ya Fedha katika kuboresha matumizi ya mifumo ya kidijitali, ikiwemo mfumo wa Control Number, ili kuongeza ufanisi na kurahisisha malipo ya huduma za Serikali.

Dkt. Sausi alisema kuwa baadhi ya changamoto zinazoathiri ufanisi wa mifumo hiyo ni pamoja na kuchelewa kwa taasisi kufanya upatanisho wa miamala (reconciliation) na hitilafu za kiufundi zinazoweza kujitokeza katika mifumo ya benki.

Alisema taasisi za Serikali zimetakiwa kufanya uhakiki wa miamala na taarifa za akaunti zao kwa wakati, huku ushirikiano kati ya Serikali, benki na wadau wa mifumo ukiendelea kuimarishwa ili kuhakikisha mapato yote yanayostahili yanakusanywa na kurekodiwa ipasavyo.

Kikao hicho ni sehemu ya maandalizi ya kikao kazi cha Maafisa Masuuli wa mafungu yote yanayokusanya mapato yasiyo ya kodi ili kwa pamoja kufanya tathmini ya ukusanyaji wa mapato kwa mwaka wa fedha 2025/26 na mikakati ilyowekwa kwa kila Fungu ili kufikia malengo ya mapato ya mwaka 2026/27 kinachotarajia kufanyika hivi karibuni.

Baadhi ya wajumbe wa kikao cha ngazi ya wataalam cha mafungu yote yanayokusanya mapato yasiyo ya kodi wakifuatilia mawasilisho mbalimbali wakati wa kikao hicho kilichofanyika jijini Dodoma katika ukumbi wa Kambarage, Treasury Square.  

CHUO CHA ELIMU YA BIASHARA CHATAKIWA KUTUMIA TAFITI KUCHOCHEA MAGEUZI YA KIUCHUMI KUELEKEA DIRA 2050

Na Mwandishi Wetu, Mwanza

Naibu Waziri wa Viwanda na Biashara, Mhe. Dennis Londo (Mb),  amekitaka Chuo cha Elimu ya Biashara (CBE) kuhakikisha wanatumia tafiti kuchochea mageuzi ya kiuchumi  kuelekea  Dira 2050.

Amesema hayo wakati wa Ufunguzi wa Mkutano wa Saba wa Kitaaluma wa Kimataifa wa Mwaka 2026 ulioandaliwa na Chuo cha CBE uliofanyika Mwanza.

Londo amesema mkutano huo unachochea mageuzi ya mifumo ya kibiashara, ubunifu, urasimishaji na matumizi ya takwimu kuelekea ukuaji endelevu wa uchumi ambapo inaunga mkono juhudi za Serikali ya Awamu ya Sita za kutekeleza Dira ya Taifa ya 2050 kwa vitendo.

Mhe. Londo pia ametoa rai kwa Taasisi za Serikali na Sekta Binafsi kuanza kutumia kikamilifu matokeo ya tafiti kutoka vyuo vya elimu ya juu ili kuleta tija na matokeo chanya kwa maendeleo ya Taifa.

Aidha amekitaka Chuo hicho kuandaa changanuzi za kisera (policy briefs) zitakazosaidia maboresho ya sera na mipango ya kiuchumi na kuweka mikakati ya kurudisha mrejesho kwa jamii kwa kuwasilisha matokeo ya tafiti kwa lugha rahisi, kuendesha mafunzo maalumu kwa wajasiriamali na wafanyabiashara, na kutoa rai kwa vyuo vingine kuiga mfano wa CBE katika kuandaa mikutano ya kitaaluma.

Vilevile amekitaka Chuo hicho kuendelea kuboresha kozi zake za muda mfupi na mrefu ili kuzalisha wataalamu wa kutosha watakaofundisha somo hilo mashuleni na kuimarisha elimu ya biashara nchini kwa kuwa Sera ya Elimu na Mafunzo ya Mwaka 2023 imefanya somo la Biashara kuwa la lazima kwa wanafunzi wa Kidato cha Kwanza hadi cha Nne kuanzia mwaka wa masomo 2025/2026.

MASAUNI: TANZANIA KUJIPANGA KUWA KITOVU CHA SOKO LA KABONI AFRIKA

Waziri wa Nchi, Ofisi ya Makamu wa Rais (Muungano na Mazingira), Mhe. Mhandisi Hamad Yussuf Masauni, akizungumza wakati akifungua Jukwaa la Soko la Kaboni na Uwekezaji Tanzania 2026, lililofanyika Jijini Dar es Salaam, Oktoba 22, 2026.

Na Mwandishi Wetu, Dar es Salaam

Waziri wa Nchi, Ofisi ya Makamu wa Rais (Muungano na Mazingira), Mhe. Mhandisi Hamad Yussuf Masauni, amesema Tanzania imejipanga kuwa kitovu cha soko la kaboni barani Afrika, huku Serikali ikiimarisha mifumo ya usimamizi, uwazi na uwekezaji ili kuhakikisha biashara hiyo inachangia ukuaji wa uchumi na kuboresha maisha ya wananchi.
 
Mhe. Masauni ameyasema hayo, Oktoba 22, 2026, wakati akifungua Jukwaa la Soko la Kaboni na Uwekezaji Tanzania 2026, lililofanyika Jijini Dar es Salaam, likiwa na kaulimbiu isemayo “Siku Moja. Soko Moja. Maono ya Pamoja.”
 
Amesema Serikali inalenga kuhakikisha kuwa biashara ya kaboni inakuwa nyenzo muhimu ya maendeleo ya Taifa kwa kuzalisha ajira, kuongeza mapato ya jamii, kuvutia uwekezaji, kuhifadhi misitu na kuendeleza matumizi ya nishati safi, sambamba na utekelezaji wa Dira ya Taifa ya Maendeleo 2050.
 
“Tanzania imeamua kuwa kitovu cha soko la kaboni lenye uadilifu barani Afrika, soko ambalo kila tani ya kaboni inayothibitishwa inatafsirika kuwa ajira kwa vijana wetu, mapato kwa vijiji vyetu, misitu iliyohifadhiwa, nishati safi majumbani mwetu na mtaji wa kutekeleza Dira ya Taifa ya Maendeleo 2050,” amesema Mhe. Masauni.
 
Amesisitiza kuwa mafanikio ya soko la kaboni hayatategemea wingi wa miradi pekee, bali ubora wa matokeo, uhalali wa kisheria, uwekezaji unaotekelezwa na manufaa halisi yanayowafikia wananchi.
 
Ameongeza kuwa, chini ya uongozi wa Rais wa Jamhuri ya Muungano wa Tanzania, Mhe. Dkt. Samia Suluhu Hassan, ajenda ya nishati safi ya kupikia ni mojawapo ya maeneo yenye fursa kubwa ya biashara ya kaboni, kutokana na uwezo wake wa kufikia mamilioni ya kaya na kuchangia kupunguza gesijoto.
 
Kwa upande wake, Mtendaji Mkuu wa Kituo cha Taifa cha Ufuatiliaji wa Kaboni (NCMC), Kathryn Kigaraba ameongeza kuwa kituo hicho kina jukumu muhimu la kusaidia maendeleo ya soko la kaboni nchini kwa kuzingatia utaalamu wa kisayansi, mbinu sahihi za kitaalamu, uwazi wa taarifa na mifumo ya ufuatiliaji na uthibitishaji.
 
Amesema lengo ni kujenga soko ambalo miradi yake inatambuliwa na kuendelezwa kwa utaratibu unaofaa, inafanyika kwa uwazi na manufaa yanayopatikana yanachangia maendeleo endelevu ya Tanzania.
 
Ameongeza kuwa utekelezaji wa azma hiyo unahitaji ushirikiano wa karibu kati ya taasisi za Serikali, waendelezaji wa miradi ya kaboni, wawekezaji, taasisi za fedha, jamii za wenyeji, taasisi za utafiti na washirika wa maendeleo.
 
Ameongeza kuwa mifumo ya kitaasisi inayohusu tathmini ya miradi, usajili wa miradi, ubadilishanaji wa taarifa na ulinzi wa haki na maslahi ya wadau ni muhimu katika kujenga imani ya soko.
 
Awali Katibu Mkuu, Ofisi ya Makamu wa Rais Dkt. Richard Muyungi alisema jamii zinazohusika na usimamizi wa misitu, ardhioevu, mikoko na maeneo mengine yenye uwezo mkubwa wa kuhifadhi kaboni zinapaswa kushirikishwa kikamilifu katika kubuni na kutekeleza miradi pamoja na kupanga namna ya kugawana manufaa.

Aidha, wanawake, vijana, wajasiriamali wa ndani na waendelezaji wa miradi midogo wanapaswa kupata nafasi katika uchumi unaochochewa na soko la kaboni.

Waziri wa Nchi, Ofisi ya Makamu wa Rais (Muungano na Mazingira), Mhe. Mhandisi Hamad Yussuf Masauni, akisalimiana na Naibu Balozi wa Norway nchini Tanzania Bw. Sondre Bjotveit mara baada ya kuwasili Hoteli ya Hyatt Regency Dar es Salaam kwa ajili ya akifungua Jukwaa la Soko la Kaboni na Uwekezaji Tanzania 2026, lililofanyika, Oktoba 22, 2026.

Waziri wa Nchi, Ofisi ya Makamu wa Rais (Muungano na Mazingira), Mhe. Mhandisi Hamad Yussuf Masauni, akiwasili Hoteli ya Hyatt Regency Dar es Salaam kwa ajili ya akifungua Jukwaa la Soko la Kaboni na Uwekezaji Tanzania 2026, lililofanyika, Oktoba 22, 2026.

Waziri wa Nchi, Ofisi ya Makamu wa Rais (Muungano na Mazingira), Mhe. Mhandisi Hamad Yussuf Masauni, akiwasili Hoteli ya Hyatt Regency Dar es Salaam kwa ajili ya akifungua Jukwaa la Soko la Kaboni na Uwekezaji Tanzania 2026, lililofanyika, Oktoba 22, 2026.