SEKTA YA VIWANDA NA BIASHARA KUONGEZA KASI YA UKUAJI WA UCHUMI - WAZIRI KAPINGA

Dodoma

Waziri wa Wizara ya Viwanda na Biashara, Mhe. Judith Kapinga (Mb), amesema sekta ya viwanda na biashara ni miongoni mwa nguzo muhimu za uchumi wa Taifa, ikichangia asilimia 15 ya Pato la Taifa na kutarajiwa kuendelea kukua kwa wastani wa asilimia sita kila mwaka.

Waziri Kapinga ameyasema hayo Novemba 2, 2026, jijini Dodoma, wakati akifungua Maonesho ya bidhaa na huduma za viwanda na Biashara sambamba na Huduma za Kliniki za Biashara yanayofanyika katika Ukumbi wa Mikutano wa Jakaya Kikwete (JKCC), kuelekea uzinduzi wa Sera ya Maendeleo Endelevu ya Viwanda ya mwaka 2025 pamoja na Sera ya Maendeleo ya Wajasiriamali Wadogo na wa Kati ya mwaka 2003, Toleo la mwaka 2025, zitakazozinduliwa Novemba 4, 2026.

Amesema maonesho hayo ni sehemu ya juhudi za Serikali kuimarisha sekta ya viwanda na biashara kwa kuweka mazingira yanayowezesha kukuza uzalishaji, kuongeza thamani ya bidhaa za ndani na kupanua masoko ya bidhaa za Tanzania.

Waziri Kapinga amesisitiza kuwa ushirikiano kati ya Serikali na sekta binafsi ni muhimu katika kufikia azma ya kuwa na uchumi mkubwa zaidi, huku sekta ya viwanda na biashara ikiendelea kuwa chanzo muhimu cha ajira na fursa za kiuchumi kwa wananchi.

Aidha, amewahimiza wananchi kutembelea maonesho hayo ili kujionea bidhaa zinazozalishwa nchini, teknolojia zinazotumika viwandani pamoja na ubunifu wa wajasiriamali na wafanyabiashara, akieleza kuwa Serikali inalenga kuhakikisha bidhaa za Tanzania zinaongezwa thamani ili kukidhi mahitaji ya soko la ndani na kushindana katika masoko ya kimataifa.

Katika maonesho hayo, taasisi mbalimbali zilizo chini ya Wizara ya Viwanda na Biashara zimeshiriki, zikiwemo Shirika la Viwango Tanzania (TBS), Shirika la Kuhudumia Viwanda Vidogo (SIDO), Mamlaka ya Maendeleo ya Biashara Tanzania (TanTrade), Wakala wa Vipimo (WMA), Tume ya Ushindani (FCC), Mamlaka ya Udhibiti wa Mbolea Tanzania (TFRA), Taasisi ya Utafiti wa Viwanda Tanzania (TIRDO), Shirika la Maendeleo ya Viwanda Vidogo (TEMDO), Kituo cha Uwekezaji Tanzania (TIC) na Mamlaka ya Maendeleo ya Biashara Tanzania (TanTrade), pamoja na taasisi nyingine za sekta hiyo.

Aidha, Waziri Kapinga ametoa pongezi na shukrani kwa kampuni na wadau mbalimbali walioshiriki katika maonesho hayo na kuunga mkono maendeleo ya sekta ya viwanda na biashara, zikiwemo ALAF, Wilmar Pasta, KEDA, Lodhia, Pepsi, Coca-Cola, Goodwill na kampuni nyingine. 

Pia alitumia fursa hiyo kuwatambua na kuwashukuru wasanii waliojitokeza kushiriki na kuhamasisha wananchi pamoja na makundi mbalimbali kushiriki katika shughuli za ufunguzi wa maonesho hayo.

Maonesho hayo pia yamehudhuriwa na wanafunzi kutoka Chuo cha Biashara (CBE), viongozi waandamizi wa Wizara, wakurugenzi na wakuu wa taasisi zilizo chini ya Wizara pamoja na wadau mbalimbali wa sekta ya viwanda na biashara.

ZUNGU AKUTANA NA RAIS WA BUNGE LA ANGOLA DAR ES SALAAM, MAANDALIZI YA MKUTANO WA WABUNGE WANAWAKE WA MAZIWA MAKUU YASHIKA KASI

Spika wa Bunge la Jamhuri ya Muungano wa Tanzania, Mhe. Mussa Azzan Zungu (Mb), amekutana na kufanya mazungumzo na Rais wa Bunge la Angola, Mhe. Adão de Almeida, leo tarehe 1 Novemba 2026 katika Ofisi Ndogo ya Bunge jijini Dar es Salaam.

Viongozi hao wamejadili maandalizi ya Mkutano wa Wabunge Wanawake wa Nchi za Maziwa Makuu utakaofanyika katika Ukumbi wa Mikutano wa Kimataifa wa Julius Nyerere (JNICC).

Mkutano huo unatarajiwa kufunguliwa rasmi kesho, tarehe 2 Novemba 2026, ambapo mgeni rasmi anatarajiwa kuwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Kikao hicho kilihudhuriwa pia na Katibu Mkuu wa Jukwaa la Wabunge wa Nchi Wanachama wa Mkutano wa Kimataifa wa Ukanda wa Maziwa Makuu (FP-ICGLR), Mhe. Balozi Dkt. Deo Mwapinga.

Tukio hili ni muendelezo wa ushirikiano wa kibunge katika ukanda wa Maziwa Makuu, likilenga kuwakutanisha viongozi na wabunge wanawake kujadili masuala mbalimbali ya kikanda.

NAIBU SPIKA AFUNGUA MAFUNZO KWA WABUNGE KUHUSU MAONI YA WATOTO DIRA 2050

 

Naibu Spika wa Bunge Mhe. Daniel Sillo amefungua mafunzo ya kuwapitisha wabunge kuhusu maoni ya yaliyotolewa na watoto katika Dira ya Taifa ya  2050.

Mafunzo hayo yamefanyika Oktoba 31, 2026 Bungeni jijini Dodoma yakiwahusisha wajumbe wa Kamati ya Bunge ya Ustawi na Maendeleo ya Jamii, Kamati ya Ufuatiliaji na Tathimini pamoja na Kikundi cha Wabunge cha Maendeleo ya Awali ya Mtoto.

Akizungumzia maoni yaliyotolewa, mmoja wa watoto aliyeshiriki kutoa maoni hayo Raphael Charles ameishukuru Serikali kwa kutambua umuhimu wa maoni ya watoto katika Dira ya 2050 ambapo jumla ya watoto 14,000 walisikilizwa maoni yao kutoka Zanzibar na Mikoa mitatu ya Tanzania Bara nchini. 

Amesema watoto ndio watakaonufaika na Dira ya 2050 hivyo ni muhumu maoni yao yalivyosikilizwa.

Mtoto huyo amesema wakati wa kukusanya maoni yao watoto wengi walitoa maoni katika sekta ya elimu, afya, lishe, upatikanaji wa maji safi na salama, ulinzi wa mtoto pamoja na ushirikishwaji wa mtoto.

Kwa upande wao, Waheshimiwa Wabunge wamesisitiza Serikali kuyafanyia kazi mapendekezo yaliyotolewa na watoto ikiwemo kuboresha lishe mashuleni, kutokomeza ukatili wa mtoto na kubadilisha Sheria ya Ndoa.

Mafunzo hayo yametolewa chini ya Mradi wa Kulijengea Bunge Uwezo (LSP III) unaofadhiliwa na Shirika la Kimataifa la Maendeleo (UNDP).

PROF. KUSILUKA AWATAKA MWAKA WA KWANZA UDOM KUJIPANGA VYEMA

Na Mwandishi Wetu, BAJP -UDOM

Wanafunzi wapya wa mwaka wa kwanza wa masomo 2026/2027 wa Chuo Kikuu cha Dodoma (UDOM) wametakiwa kujikita katika masomo  chuoni hapo na kutumia muda na rasilimali fedha kwa weledi ili waweze kutimiza ndoto zao za kitaaluma.
 
Hayo yamebainishwa na Makamu Mkuu wa Chuo cha UDOM, Prof. Lughano Kusiluka, wakati akizungumza na hadhara hiyo ya wanafunzi wapya wa mwaka wa kwanza katika semina elekezi iliyofanyika katika Ukumbi wa Chimwaga, iliyolenga kuwajengea uelewa kuhusu mazingira ya Chuo, mifumo ya uendeshaji, taratibu za masomo na mambo muhimu ya kuzingatia katika maisha yao ya elimu ya juu wawapo UDOM.
 
Prof. Kusiluka amesema kuna mambo mengi ambayo yanapelekea  mafanikio kwa mwanafunzi wa Chuo Kikuu, ambapo amesema nidhamu ya kitaaluma, kupangalia muda na fedha vizuri ili kuweza kufikia mafanikio.
 
“Kuna vitu vingi vinavyopelekea kufanikiwa kwa mwanafunzi wa Chuo kikuu, hii ni kuanzia na kua na nidhamu ya kitaaluma, kupanga vyema muda wako na namna ya matumizi yako ya fedha, na kuto kufanya hivyo kutapelekea kuanguka na kushindwa kutimima malengo yako,” alisema Prof Kusiluka.
 
Amesema wanafunzi kama taifa ni mtaji hivyo taifa linawekeza kwao kitaaluma ili nao waweze kuungana na Watanzania wengine katia kuleta maendeleo na kufanya taifa kuwa bora kupitia kile wanachojifunza.
 
Prof. Kusiluka amewakumbusha wanafunzi hao wanapaswa kuthamini fursa waliyoipata na kuitumia kwa manufaa yao binafsi na jamii kwa ujumla.
 
“Jikiteni katika masomo yenu, tumieni muda wenu vizuri na fanyeni maamuzi sahihi yatakayowawezesha kufikia malengo yaliyowaleta hapa. Epukeni vitendo na mienendo inayoweza kusababisha kufeli au kuacha masomo kabla ya kuhitimu,” alisisitiza Prof. Kusiluka.
 

Aidha, Prof Kusiluka aliwataka wanafunzi hao kutumia teknolojia ya mawasiliano ikiwemo simu kama nyenzo ya kujifunzia na kupata maarifa zaidi badala ya mambo yasiyo ya msingi.

Kuhusu michezo ya kubahatisha, Prof Kusilika amesema si vyema kwa wanafunzi kushiriki michezo hiyo kwani wengi huishia kwenye matumizi mabaya ya fedha za kujikum chuo na ada hivyo kupelekea mwanafunzi kushindwa kusoma kwa umakini.

Kwa upande wake, Mkurugenzi wa Shahada za Awali, Prof. Godlisten Kombe, amewasisitiza wanafunzi hao kuweka kipaumbele katika masomo yao, kuepuka mambo yasiyo na tija yanayoweza kuwatoa katika malengo yao na kuzingatia taratibu za kitaaluma, hususan katika mitihani na masuala ya uongozi.
 
Semina Elekezi hiyo ni sehemu ya jitihada za Chuo katika kuwaandaa wanafunzi wapya kukabiliana na maisha ya elimu ya juu kwa kuwapatia uelewa kuhusu mifumo ya uendeshaji wa Chuo, uongozi, wajibu wao na fursa mbalimbali zilizopo, ili waanze safari yao ya kitaaluma wakiwa na maarifa na mwelekeo sahihi.
 
Ndaki zilizoshiriki katika semina hiyo elekezi ya Makamu Mkuu wa Chuo ni pamoja na Ndaki ya Insia na Sayansi za Jamii (CHSS), Ndaki ya Biashara na Uchumi (CoBE), Ndaki ya Sayansi ya Dunia na Uhandisi (CoESE), Ndaki ya Elimu (CoED), Ndaki ya TEHAMA na Elimu Mtandao (CoIVE) na Ndaki ya Sayansi Asilia na Hisabati (CNMS).
 
Aidha wanafunzi kutoka Shule Kuu ya Sheria (SoL), Shule Kuu ya Tiba na Meno (SoMD) na Shule Kuu ya Uuguzi na Afya ya Jamii (SONPH) nao walishiriki semina hiyo ya Makamu Mkuu wa Chuo.

INEC YAWAPA NENO MAKARANI WAONGOZAJI WAPIGA KURA KATA YA NONDE

Tume Huru ya Taifa ya Uchaguzi (INEC) imewataka Makarani Waongozaji Wapiga Kura katika kata ya Nonde iliyopo Halmashauri ya Jiji la Mbeya Mkoani Mbeya kutekeleza majukumu yao kwa weledi.
 
Hayo yamebainishwa leo Oktoba 31, 2026 na Mwenyekiti wa Tume Huru ya Taifa ya Uchaguzi Mhe. Jaji wa Rufani Jacobs Mwambegele wakati akizungumza na watendaji hao alipotembelea mafunzo yao ya siku moja ikiwa ni sehemu ya maandalizi ya uchaguzi Mdogo wa Udiwani katika Kata ya Nonde unaotarajiwa kufanyika tarehe 04 Novemba,2026.
 
Jaji Mwambegele  amewasisitiza washiriki hao  kufanya kazi kwa weledi na kwa kuzingatia Sheria na Kanuni ili kuufanya uchaguzi huo kuwa huru na wa haki.
 
Awali kabla ya ufunguzi wa Mafunzo haya, washiriki hao waliapa kiapo cha kutunza siri na kile cha kujitoa uanachama wa chama cha siasa ili waweze kutekeleza majukumu yao kwa haki na weledi.
 
Uchaguzi huo utafanyika ikiwa ni miongoni mwa kata  kata 11 za Tanzania Bara ambazo ni Lugenge, Halmashauri ya Mji Njombe; Bargish, Halmashauri ya Mji Mbulu; Makole, Halmashauri ya Wilaya ya Muheza; Mwera, Halmashauri ya Wilaya ya Pangani na Oldonyosambu, Halmashauri ya Wilaya ya Ngorongoro.
 
Nyingine ni Igalula iliyopo Halmashauri ya Wilaya ya Uyui; Shelui, Halmashauri ya Wilaya ya Iramba; Mvumi, Halmashauri ya Wilaya ya Kilosa; Nyarero, Halmashauri ya Wilaya ya Tarime na Ilolangulu, Halmashauri ya Wilaya ya Mbogwe.

SERIKALI KUZINDUA SERA MPYA YA VIWANDA NA JASIRIAMALI NDOGO NA ZA KATI JIJINI DODOMA-MHE KAPINGA

Na Mwandishi Wetu, Dar es Salaam
Serikali kupitia Wizara ya Viwanda na Biashara inatarajia kuzindua sera mbili mpya zinazolenga kuimarisha maendeleo ya sekta ya viwanda na jasiriamali ndogo na za kati nchini ikiwa ni sehemu ya mikakati ya kuongeza uzalishaji, ajira, uongezaji thamani wa malighafi za ndani na ushindani wa bidhaa za Tanzania katika masoko ya ndani na nje ya nchi.

Akizungumza na waandishi wa habari leo, Oktoba 31, 2026, katika Ukumbi wa Shirika la Viwango Tanzania (TBS), jijini Dar es Salaam, Waziri wa Wizara ya Viwanda na Biashara, Mhe. Judith Kapinga (Mb), amesema Sera hizo ni Sera ya Maendeleo Endelevu ya Viwanda ya Mwaka 2025 na Sera ya Maendeleo ya jasiriamali ndogo na za Kati ya Mwaka 2003 (Toleo la Mwaka 2025). 

Amesema Sera hizo zimefanyiwa mapitio ili kuendana na mahitaji ya sasa ya kiuchumi na kuweka mazingira wezeshi ya biashara, uwekezaji na uzalishaji nchini na kuongeza kuwa zitaimarisha pia  mchango wa sekta ya viwanda katika uchumi wa Taifa.

Mhe Kapinga aliongeza kuwa Serikali inalenga kuongeza mchango wa sekta hiyo hadi kufikia asilimia 15 ya Pato la Taifa, sambamba na kuongeza uzalishaji, uongezaji thamani wa malighafi za ndani na ushindani wa bidhaa za Tanzania katika masoko ya ndani na nje ya nchi.

Waziri Kapinga amesema Wizara imejipanga vizuri kutekeleza maelekezo ya Mhe. Rais ya kuhakikisha kila sekta inajipanga na kujiratibu upya ili kuongeza kasi ya ukuaji wa uchumi wa Taifa.

Aidha, Waziri Kapinga amesema Serikali inaendelea kuimarisha na kuitangaza nembo ya Made in Tanzania kwa lengo la kuongeza utambuzi na kuaminika kwa bidhaa zinazozalishwa nchini, kukuza matumizi ya bidhaa za ndani na kupanua fursa za masoko kwa wazalishaji wa Kitanzania. 

Amesema hatua hiyo ni muhimu katika kuhamasisha wananchi kuthamini bidhaa za ndani na kuimarisha ushindani wake katika masoko ya kimataifa.

Kwa upande wa maendeleo ya wajasiriamali wadogo na wa kati, Waziri Kapinga amesema Sera husika inalenga kuboresha miundombinu wezeshi, kuongeza upatikanaji wa mitaji, kukuza matumizi ya teknolojia na ubunifu pamoja na kurahisisha upatikanaji wa masoko kwa bidhaa na huduma zinazozalishwa na wajasiriamali hao ma hatua hiyo inalenga kuwawezesha wajasiriamali kukuza biashara zao, kuongeza tija na kuchangia katika ukuaji wa uchumi wa Taifa.

Kwa upande wa Sera ya Maendeleo Endelevu ya Viwanda, amesema inalenga kuongeza thamani ya mazao na rasilimali zinazozalishwa nchini kupitia uimarishaji wa mnyororo wa thamani, kuendeleza viwanda vya kimkakati, kuongeza uzalishaji wa bidhaa zenye ubora na kuimarisha uwezo wa viwanda vya ndani kushindana katika masoko. 

Aidha, sera hiyo inalenga kuchochea uwekezaji katika sekta ya viwanda na kuongeza fursa za ajira kwa wananchi.

Kuelekea uzinduzi huo, Wizara ya Viwanda na Biashara imeandaa maonesho na kliniki za biashara Novemba 2 na kongamano la wadau wa sekta ya Viwanda na Biashara wanatarajia kukutana Novemba 3, 2026, kwa lengo la kuwapa wadau wa sekta ya viwanda na biashara fursa ya kujifunza kuhusu sera hizo, kujadili masuala ya utekelezaji na kuelewa mchango wao katika kuimarisha maendeleo ya viwanda na ujasiriamali nchini.

Uzinduzi rasmi wa Sera hizo utafanyika Novemba 4, 2026, jijini Dodoma, ambapo Waziri Mkuu wa Jamhuri ya Muungano wa Tanzania, Mhe. Dkt. Mwigulu Lameck Nchemba, anatarajiwa kuwa Mgeni Rasmi.

TANZANIA, ANGOLA KUIMARISHA UHUSIANO WA KIDIPLOMASIA NA KUPANUA USHIRIKIANO WA KIUCHUMI

Tanzania imetangaza kufungua tena ubalozi wake jijini Luanda nchini Angola, hatua inayolenga kuimarisha uhusiano wa kidiplomasia na kupanua ushirikiano na nchi hiyo katika biashara, uwekezaji na sekta nyingine za kimkakati.

Uamuzi huo umetangazwa na Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, wakati wa mazungumzo rasmi na Mheshimiwa João Manuel Gonçalves Lourenço, Rais wa Jamhuri ya Angola, leo, tarehe 29 Oktoba, 2026, Ikulu jijini Dar es Salaam.
 
Rais Lourenço yuko nchini kwa ziara ya kitaifa, ikiwa ni ya pili kufanywa na Rais wa Angola tangu ziara ya Rais wa kwanza na Muasisi wa nchi hiyo, Hayati António Agostinho Neto, mwaka 1979. Akizungumza na waandishi wa habari, Rais Dkt. Samia amesema kiwango cha biashara kati ya Tanzania na Angola bado ni cha chini licha ya uhusiano wa muda mrefu na fursa zilizopo katika mataifa yote mawili.
 
Ili kukuza kiwango cha biashara, Tanzania imeikaribisha Angola kununua mazao yake ya chakula, huku ikiona fursa ya kuagiza bidhaa za petroli na mbolea kutoka Angola. Ili kurahisisha biashara, nchi zote mbili zimekubaliana kuunganisha reli ya Benguela nchini Angola na TAZARA kupitia Zambia na Jamhuri ya Kidemokrasia ya Kongo, kuwezesha usafirishaji wa mizigo kati ya Bandari ya Lobito katika Bahari ya Atlantiki na Bandari ya Dar es Salaam katika Bahari ya Hindi.
 
Kwa upande wa usafiri wa anga, Rais Dkt. Samia amesema Tanzania na Angola zinalenga kuanzisha safari za ndege zitakazounganisha nchi hizo bila kupita nchi nyingine.
 
“Kwa sasa, tunataka kuanzisha safari za moja kwa moja kati ya Dar es Salaam na Luanda,” amesema Rais Dkt. Samia.
 
Katika sekta ya nishati, Rais Dkt. Samia amesema Shirika la Maendeleo ya Petroli Tanzania (TPDC) limeanza kutathmini uwezekano wa kuwekeza katika kiwanda cha kusafisha mafuta cha Lobito nchini Angola.
 
Nchi hizo pia zimekubaliana kubadilishana uzoefu katika kuongeza thamani ya madini na kuwajengea uwezo wataalamu na wachimbaji wadogo, ili waweze kunufaika zaidi na rasilimali hizo.
 
Kwa upande wake, Rais Lourenço ametambua mchango wa Tanzania chini ya Baba wa Taifa, Hayati Mwalimu Julius Kambarage Nyerere, katika kusaidia harakati za ukombozi wa Angola zilizoongozwa na Hayati Dkt. António Agostinho Neto, akisema viongozi wa sasa wana wajibu wa kuendeleza urafiki huo kwa kukuza uchumi na kuboresha maisha ya wananchi.
 
Katika sekta ya afya, amesema Angola inalenga kuajiri kwa mikataba wataalamu wa afya kutoka Tanzania ili kukabiliana na upungufu wa watumishi katika hospitali zake zinazoongezeka.
 
Rais Lourenço amesema nchi yake itashirikiana na Tanzania katika kubadilishana utaalamu na kutoa mafunzo kupitia taasisi za elimu ya tiba, pamoja na kuboresha huduma za afya ya mama na mtoto.
“Hata tuwe na rasilimali nyingi kiasi gani, hatuwezi kufikia maendeleo na kuboresha maisha ya wananchi wetu bila kushirikiana,” amesema Rais Lourenço, akisisitiza umuhimu wa nchi za Afrika kutumia uwezo uliopo miongoni mwao kukabiliana na changamoto za maendeleo.
 
Katika hatua nyingine, viongozi hao wameshuhudia kusainiwa kwa mikataba na hati za makubaliano ya ushirikiano katika sekta za anga, mawasiliano na hali ya hewa. Rais Lourenço ataendelea na ziara yake kesho mkoani Dodoma, ambapo, akiambatana na mwenyeji wake, atashiriki katika hafla ya uzinduzi wa Majengo ya Ofisi, Wizara na Taasisi za Serikali, na Barabara za Lami katika Mji wa Serikali Mtumba.

RIS SAMIA AMTUMBUA MALISA, AMTEUA ANGELINE MABULA RC TABORA

 

Mkuu Mpya wa Mkoa wa Tabora, Dkt.Angeline Mabula 

𝑴𝑨𝑲𝑨𝑴𝑼 𝑾𝑨 𝑹𝑨𝑰𝑺 𝑨𝑨𝑮𝑰𝒁𝑨 𝑴𝑷𝑨𝑵𝑮𝑶 𝑴𝑲𝑨𝑲𝑨𝑻𝑰 𝑾𝑨 𝑲𝑼𝑾𝑨𝑨𝑵𝑫𝑨𝑨 𝑽𝑰𝑱𝑨𝑵𝑨 𝑲𝑼𝑵𝑼𝑭𝑨𝑰𝑲𝑨 𝑵𝑨 𝑴𝑰𝑹𝑨𝑫𝑰 𝒀𝑨 𝑴𝑨𝑭𝑼𝑻𝑨 𝑵𝑨 𝑮𝑬𝑺𝑰

Makamu wa Rais wa Jamhuri ya Muungano wa Tanzania, Mhe. Deogratius Ndejembi, ameiagiza Wizara ya Nishati kupitia Mamlaka ya Udhibiti wa Shughuli za Mkondo wa Juu wa Petroli (PURA) kuandaa mpango mkakati wa kuwajengea uwezo vijana na kampuni za Kitanzania ili washiriki kikamilifu katika miradi ya mafuta na gesi asilia.

Ametoa maelekezo hayo leo, Oktoba 28, 2026, jijini Dar es Salaam, katika hafla ya utiaji saini leseni za utafutaji wa mafuta na gesi.

Katika hafla hiyo, Makamu wa Rais alimwita mbele kijana Mwizegwa Rusibamanyila, aliyeacha kazi nje ya nchi na kurudi nyumbani kuanzisha kampuni yake inayofanya kazi katika kitalu cha gesi cha Mnazi Bay, mkoani Mtwara. Kampuni hiyo imeajiri zaidi ya Watanzania 50, na asilimia 80 kati yao wanatoka katika kijiji kinachozunguka mradi huo. Miongoni mwao ni binti aliyeajiriwa akiwa bado mwanafunzi, akaendelezwa kielimu, na sasa ni mmoja wa wasimamizi wa mradi huo.

“Kitengo cha local content tukikisimamia vizuri, tuna uwezo wa kuzalisha akina Rusibamanyila wengi zaidi ambao watakuja kuajiri Watanzania wenzao katika miradi ya mafuta na gesi,” amesema Mhe. Ndejembi.

Amesisitiza kuwa maandalizi ya vijana hao yaanze sasa, kabla miradi mikubwa ikiwemo mradi wa LNG mkoani Lindi haijakamilika, ili Watanzania wawe tayari kushiriki kama wataalamu, watoa huduma na wasambazaji wa bidhaa.

Aidha, amemshauri Waziri wa Nishati kuandaa tuzo maalum kwa kijana huyo kutokana na kazi kubwa anayoifanya.

KITWIMA YOUTH GROUP, SHAMBA DARASA KWA VIJANA KUCHANGAMKIA FURSA ZA UCHUMI

Na: Dk. Reubeni Lumbagala

Serikali ina vipaumbele vingi vya maendeleo kwa ajili ya watu wake. Miongoni mwao ni uwezeshaji wananchi kiuchumi. Hapa serikali huweka mazingira rafiki na wezeshi kwa ajili ya kuhakikisha wananchi wanatumia fursa mbalimbali za kiuchumi zilizopo ili kujiongezea kipato na kuchangia maendeleo ya nchi.

Katika juhudi za maendeleo, kundi la vijana ni muhimu kuwezeshwa ili nao washiriki kikamilifu katika maendeleo. Vijana wana nguvu na maarifa ya kuweza kuzalisha na hatimaye kubadili hali zao za maisha kutoka hali duni na kuwa nzuri zaidi. Ni kundi ambalo likiwezeshwa, maendeleo yatasonga mbele kwa haraka zaidi.

Kutokana na umuhimu wa kundi la vijana katika maendeleo, Rais Dk. Samia Suluhu Hassan ameanzisha wizara maalum ya kushughulikia masuala ya vijana - Ofisi ya Rais - Maendeleo ya Vijana chini ya uongozi wa Waziri wake, Joel Nanauka.

Wizara hii hajachanganywa na sekta nyingine yeyote, imebaki kushughulikia masuala ya maendeleo ya vijana. Basi. Huu ni upekee wa aina yake kutokana na dhamira ya serikali ya kuhakikisha kundi la vijana linakamata fursa muhimu za uchumi kwa maendeleo.

Katika kuhakikisha uwezeshaji vijana kiuchumi haubaki kuwa mpango wa kwenye makaratasi tu, serikali ikaweka katika vitendo kwa kutoa shilingi bilioni 200 ili zikopeshwe kwa vijana bila riba. Fedha hizi zikawekewa utaratibu kwa vijana katika vikundi waungane na watume maombi na kwa wale watakaokidhi vigezo watakopeshwa.

Kikundi cha vijana cha Kitwima yaani Kitwima Youth Group (KYG) ni miongoni mwa wanufaika wa mkopo wa shilingi bilioni 200 zilizokopeshwa na vijana nchi nzima. Kikundi hiki ni cha vijana wasomi ambapo wamejikita katika ufugaji wa samaki kwa njia ya vizimba, katika Ziwa Viktoria, mkoani Mwanza.

Ni kwamba, kikundi hiki kilipata mkopo wa shilingi milioni 106.9, mwezi Machi, 2026. Baada ya kupokea fedha hizo, walinunua vifaranga vya samaki 60,000 kwa shilingi milioni tisa, wakaongezwa vifaranga 6,000 na kufanya vifaranga vya samaki kufika 66,000.

Vilevile, walitengeneza keji kwa shilingi milioni 35, wakanunua mtumbwi, chakula cha samaki na majaketi ya kuwasaidia katika shughuli zao za uvuvi (life jackets). Ndani ya miezi saba ya shughuli hiyo (Machi - Oktoba, 2026) wameweza kuzalisha samaki tani 15 aina ya Sato ambao mauzo yake yana thamani ya shilingi milioni 127.5.

Kimsingi, kikundi hiki kimeonyesha uthubutu mkubwa na kimetoa darasa kwa vijana wenzao katika maeneo mbalimbali ya nchi yetu, kuchangamkia fursa za uchumi zinazoratibiwa na serikali. Kupitia mradi huu, vijana hao wamejihakikishia kipato kupitia mauzo ya samaki pindi wanapowavuna.  

Pengine sana, kupitia mafanikio ya kikundi cha Kitwima, vijana waongeze ari ya kufuatilia mikopo inayotokewa na Wizara ya Vijana na Wizara nyingine ili vijana waweze kubadili maisha yao kwa kujiajiri wenyewe. Aidha, waliopewa dhamana ya kushughulikia mikopo ya vijana watende haki, waondoe urasimu ili vijana wanufaike na fursa hizo muhimu kwa maendeleo endelevu.

Maoni : 0620 800 462.

SERIKALI YALAANI UBAKAJI, YATOA WITO KWA WANANCHI KUTOKUINGILIA KESI ZA UKATILI

Na Jackline Minja, Dodoma

Serikali imelaani vikali vitendo vya ubakaji na ukatili wa kijinsia vinavyosababisha waathirika kupata mimba, huku ikiwataka wazazi, ndugu na wananchi kwa ujumla kutokuingilia mchakato wa kisheria katika kesi zinazohusu ubakaji na ulawiti, ili kuhakikisha waathirika wanapata haki na wahusika wanawajibishwa kwa mujibu wa sheria.

Akijibu swali la Mbunge wa Viti Maalum, Mhe. Hawa Mchafu Chakoma, kuhusu kauli ya Serikali juu ya matukio ya ubakaji yanayoendelea na kusababisha waathirika kupata mimba, Naibu Waziri wa Maendeleo ya Jamii, Jinsia, Wanawake na Makundi Maalum, Mhe. Mhandisi Maryprisca Mahundi, amesisitiza kuwa Serikali inaendelea kuimarisha utekelezaji wa sheria zinazolinda watoto dhidi ya vitendo vya ukatili, ikiwemo ubakaji na ulawiti.

Katika majibu ya Serikali, imeelezwa kuwa kuanzia Januari hadi Desemba 2025, jumla ya makosa 7,219 ya ubakaji yaliripotiwa na kushughulikiwa, hatua inayoonesha umuhimu wa kuendelea kuimarisha mikakati ya kukabiliana na vitendo hivyo na kuhakikisha waathirika wanapata huduma na ulinzi unaostahili.

Aidha, Serikali inaendelea kutoa elimu kwa umma kuhusu namna ya kujikinga na ukatili pamoja na kuimarisha mifumo ya utoaji huduma kwa waathirika kupitia Ofisi za Ustawi wa Jamii, Madawati ya Jinsia na Watoto ya Jeshi la Polisi na Ofisi za Serikali za Mitaa.

Katika hatua nyingine, Mhe. Mahundi amewasihi wazazi na ndugu kutokuingilia kesi za ubakaji na ulawiti zilizo katika vyombo vya sheria, ikiwemo kwa kuzuia utoaji wa ushahidi au kushinikiza hatua zinazoweza kuathiri mwenendo wa haki.

Serikali pia imewahimiza wananchi kutoa taarifa za vitendo vya ukatili na kushirikiana na vyombo vya dola katika kutoa ushahidi ili wahusika wawajibishwe. Wananchi wanaweza kutoa taarifa kupitia namba ya Dawati la Jinsia na Watoto la Jeshi la Polisi 0699 913200 au kupiga namba 116 wakati wote wanapohitaji kuripoti vitendo vya ukatili dhidi ya watoto.

WAOMBAJI MIKOPO YA ELIMU WAPEWA SIKU 7 KUWASILISHA RUFAA ZAO

Na: Mwandishi Wetu

Waombaji wa mikopo ya elimu ya juu ambao wana taarifa za ziada ambazo hawakuziwasilisha katika maombi ya awali, wameshauriwa kuzitumia vyema siku saba kukata rufaa ili waweze kunufaika na mikopo hiyo.

Wito huo umetolewa na Bodi ya Mikopo ya Wanafunzi wa Elimu ya Juu (HESLB) ambapo rufaa hizo zinapokelewa kuanzia Oktoba 25 hadi 31, 2026.

Rufaa hizo ni mahsusi kwa waombaji wa mikopo kwa mwaka wa masomo 2026/2027 huku lengo likiwa ni kuwapa waombaji hao nafasi ya kuwasilisha taarifa za ziada ili waweze kuzingatiwa katika utoaji wa mikopo hiyo.

Kwa upande wake, Mkurugenzi Mtendaji wa HESLB, Dk. Bill Kiwia, amesisitiza umuhimu wa kuzitumia vizuri siku hizo ili kuondoa malalamiko kwa waombaji wenye taarifa zinazoweza kusaidia kupangiwa mikopo kwa viwango wanavyostahili.

"Serikali kupitia Bodi ya Mikopo imedhamiria kuhakikisha kila mwanafunzi mwenye sifa ya kupata mkopo anapangiwa mkopo … hivyo, siku saba za rufaa zilizotolewa zitumike vizuri kwa waombaji wote wenye vielelezo vya ziada vinavyoweza kusaidia kupata mikopo ya elimu," amesema Dk. Kiwia.

Kwa mwaka wa fedha 2026/2027, HESLB inatarajia kutumia shilingi trilioni 1.06 kwa ajili ya mikopo na ruzuku kwa wanafunzi wasiopungua 300,000. 

Aidha, fedha hizo ni ongezeko la asilimia 15.6 ikilinganishwa na shilingi bilioni 916.7 zilizotolewa kwa mwaka wa masomo 2025/2026 zilizogharimia masomo ya wanafunzi 289,932.

WAZIRI KAPINGA AZINDUA KIWANDA KIPYA.

KIBAHA, PWANI

Waziri wa Wizara ya Viwanda na Biashara, Mhe. Judith Kapinga (Mb), ameipongeza kampuni ya Simba Beverages Limited kwa uwekezaji wa takribani Shilingi bilioni 28 katika sekta ya viwanda nchini, akieleza kuwa uwekezaji huo ni sehemu ya juhudi za kuimarisha uchumi kupitia uzalishaji wa bidhaa nchini, kuongeza ajira na kupanua wigo wa mapato ya Serikali.

Akizungumza wakati wa uzinduzi wa kiwanda hicho kilichopo katika eneo la viwanda la Zegereni, Kibaha, mkoani Pwani, Waziri Kapinga amesema,Serikali inaendelea kutekeleza maelekezo ya Rais wa Jamhuri ya Muungano wa Tanzania Mhe. Dkt Samia Suluhu Hassan ya kufungua viwanda vipya nchini na kuvutia uwekezaji wa viwanda vipya ili kuchochea ukuaji wa uchumi na kuongeza fursa za ajira kwa Watanzania.

Amesema sekta ya vinywaji baridi ni miongoni mwa sekta muhimu katika kukuza uchumi wa viwanda kutokana na mchango wake katika uzalishaji, ajira na uwekezaji, pamoja na kuunganisha shughuli nyingine za kiuchumi zikiwemo kilimo, usindikaji na usambazaji wa bidhaa. Amesisitiza kuwa maendeleo ya sekta hiyo yanapaswa kwenda sambamba na matumizi ya malighafi zinazopatikana nchini ili kuongeza thamani ya rasilimali za ndani na kunufaisha wazalishaji wa Kitanzania.

Waziri Kapinga ameeleza kuwa Serikali itaendelea kuboresha mazingira ya biashara na uwekezaji, huku akiwataka wawekezaji kuhakikisha bidhaa zinazozalishwa nchini zinazingatia sheria, kanuni na viwango vya ubora na usalama. Amesisitiza pia umuhimu wa kulinda wafanyakazi na kuboresha mazingira ya kazi ili kuimarisha ushindani wa bidhaa za Tanzania katika masoko ya ndani na nje ya nchi.

Kwa upande wake, Mkuu wa Wilaya ya Kibaha, Mhe. Fadhili Nkurlu, amesema idadi ya viwanda katika Mkoa wa Pwani imeongezeka kutoka viwanda 387 katika kipindi cha mwaka 2021/2022 hadi kufikia viwanda 768 kufikia Septemba 2026. Alieleza kuwa viwanda hivyo vinajumuisha viwanda vikubwa 33, vya kati 33, vidogo 248 na vidogo zaidi 454.

Ameongeza kuwa viwanda vikubwa na vya kati 38 vilikuwa katika hatua za ujenzi ila sasa vimekamilika, vikiwemo viwanda vikubwa 27 na vya kati 11, huku viwanda vingine 99 vikiwa katika hatua mbalimbali za ujenzi na maandalizi. Aidha, alisema viwanda 35 vilivyopo katika maeneo ya uwekezaji mkoani humo vimechangia kuzalisha ajira za moja kwa moja 2,357 na ajira nyingine zisizo rasmi 6,062 zinazotokana na shughuli za kiuchumi zinazohusiana na viwanda hivyo.

Mhe. Nkurlu amesema Mkoa wa Pwani unaendelea kuweka kipaumbele katika kuvutia uwekezaji wa viwanda vipya, kuongeza ajira kwa vijana, kuhamasisha matumizi ya malighafi zinazopatikana nchini na kusimamia ubora na usalama wa bidhaa zinazozalishwa. Ameeleza kuwa uwekezaji wa Simba Beverages Limited ni sehemu ya juhudi za kujenga uchumi imara na wenye ushindani kupitia sekta ya viwanda.

Kwa upande wake, Afisa mkuu wa fedha Surya Murthy, Afisa Mkuu wa Fedha (CFO) wa Simba Beverages Limited, ameishukuru Serikali kupitia Wizara ya Viwanda na Biashara pamoja na viongozi wa Mkoa wa Pwani na Wilaya ya Kibaha kwa ushirikiano wao katika kuwezesha uwekezaji huo. Ameeleza kuwa uzinduzi wa kiwanda hicho ni hatua muhimu katika kuendeleza shughuli za uzalishaji nchini, kuongeza thamani ya bidhaa na kuimarisha minyororo ya ugavi, huku kampuni ikiendelea kutekeleza dhamira yake kupitia kaulimbiu ya “Imezaliwa Tanzania, Inatumikia Afrika.”

Kwa mujibu wa taarifa zilizotolewa katika hafla hiyo, Simba Beverages Limited imewekeza katika uzalishaji wa vinywaji baridi vyenye gesi pamoja na vifungashio vya plastiki. Mitambo ya kiwanda hicho ina uwezo wa kuzalisha chupa 12,000 za vinywaji baridi kwa saa, huku kampuni ikitarajia kuzalisha ajira za moja kwa moja 100 na ajira nyingine 200 zisizo za moja kwa moja kadri shughuli zake zitakavyopanuka.

Aidha, kampuni hiyo imeeleza kuwa inatumia zaidi ya asilimia 90 ya malighafi zinazopatikana nchini, hatua inayochangia kuimarisha mnyororo wa thamani wa uzalishaji wa ndani. Kampuni pia inalenga kuongeza mauzo yake hadi Sh bilioni 15.4 ifikapo mwaka 2027 na Sh bilioni 33 ifikapo mwaka 2030, kwa mujibu wa taarifa zilizowasilishwa katika uzinduzi huo.

Uwekezaji wa Simba Beverages Limited unaonesha nafasi ya sekta binafsi katika kuendeleza viwanda nchini, kuongeza ajira na kuimarisha uchumi unaotegemea uzalishaji wa bidhaa na matumizi ya rasilimali zinazopatikana ndani ya nchi. Serikali inaendelea kuhimiza wawekezaji kutumia malighafi za ndani, kuongeza thamani ya bidhaa, kuhamisha teknolojia na kuhakikisha Watanzania wananufaika na fursa zinazotokana na maendeleo ya sekta ya viwanda.