WAZIRI MKUU ATEMBELEA NA KUKAGUA TAASISI YA ELIMU YA USHIRIKA NA BIASHARA KIZUMBI (KICoB)

Muonekano wa jengo jipya la taaluma la Taasisi ya Elimu ya Ushirika na Biashara Kizumbi, Manispaa ya Shinyanga, lililokaguliwa na Waziri Mkuu, Dkt. Mwigulu Nchemba, Novemba 9, 2026. Jengo hilo na bweni la wanafunzi wa kike yamejengwa kwa jumla ya shilingi bilioni 8.98 kupitia mradi wa HEET.

Waziri Mkuu, Dkt. Mwigulu Nchemba, akisalimiana na Waziri wa Elimu, Sayansi na Teknolojia, Prof. Adolf Mkenda, alipowasili katika Taasisi ya Elimu ya Ushirika na Biashara Kizumbi, Manispaa ya Shinyanga, Novemba 9, 2026. Katikati ni Mkuu wa Chuo Kikuu cha Ushirika Moshi, Anna S. Makinda.

Waziri Mkuu, Dkt. Mwigulu Nchemba, akizungumza wakati akikagua ukumbi wa mihadhara katika Taasisi ya Elimu ya Ushirika na Biashara Kizumbi, Novemba 9, 2026. Walioketi kutoka kushoto ni Mkuu wa Mkoa wa Shinyanga, Mboni Mhita; Waziri wa Elimu, Sayansi na Teknolojia, Prof. Adolf Mkenda; na Mkuu wa Chuo Kikuu cha Ushirika Moshi, Anna S. Makinda.

Waziri Mkuu, Dkt. Mwigulu Nchemba, akikagua samani katika ukumbi wa mihadhara wa Taasisi ya Elimu ya Ushirika na Biashara Kizumbi, Manispaa ya Shinyanga, wakati wa ziara yake ya kikazi, Novemba 9, 2026.

Waziri wa Elimu, Sayansi na Teknolojia, Prof. Adolf Mkenda, akitoa maelezo kwa Waziri Mkuu, Dkt. Mwigulu Nchemba (kulia), kuhusu uwekezaji katika elimu ya juu, wakati wa ziara yake katika Taasisi ya Elimu ya Ushirika na Biashara Kizumbi, Manispaa ya Shinyanga, Novemba 9, 2026.

Waziri Mkuu, Dkt. Mwigulu Nchemba, akisalimiana na Waziri wa Elimu, Sayansi na Teknolojia, Prof. Adolf Mkenda, alipowasili katika Taasisi ya Elimu ya Ushirika na Biashara Kizumbi, Manispaa ya Shinyanga, Novemba 9, 2026. Katikati ni Mkuu wa Chuo Kikuu cha Ushirika Moshi, Anna S. Makinda.

Waziri Mkuu, Dkt. Mwigulu Nchemba, akisalimiana na Mkuu wa Chuo Kikuu cha Ushirika Moshi (MoCU), Anna S. Makinda, alipowasili kutembelea na kukagua miradi katika Taasisi ya Elimu ya Ushirika na Biashara Kizumbi (KICoB), Manispaa ya Shinyanga, Novemba 9, 2026.

MAKAMU WA RAIS ATAKA KUFUFULIWA KILIMO CHA MAUA ARUSHA, AHIMIZA USHIRIKI WA VIJANA KATIKA KILIMO

Na Mwandishi Wetu, ARUSHA
Makamu wa Rais wa Jamhuri ya Muungano wa Tanzania, Deogratius John Ndejembi, amesema thamani ya mauzo ya nje ya mazao ya bustani nchini imekaribia kuongezeka maradufu ndani ya miaka minne, ikifikia dola za Marekani milioni 569 mwaka 2024, huku Serikali ikiendeleza taratibu za kufungua masoko mapya katika nchi 14.
 
Ndejembi amesema hayo leo akimwakilisha Rais wa Jamhuri ya Muungano wa Tanzania, Dkt. Samia Suluhu Hassan kwenye  ufunguzi wa  Maonesho ya Kimataifa ya Bidhaa na Mazao ya Bustani, HortiLogistica Africa 2026, katika viwanja vya TGT, Halmashauri ya Arumeru - Arusha.
 
Amesema mauzo hayo yameongezeka kutoka dola milioni 290.7 mwaka 2020, huku tasnia hiyo ikikua kwa wastani wa asilimia tisa hadi 12 kwa mwaka.
 
Amesema taratibu za kufungua masoko mapya zitaendelezwa mwaka wa fedha 2026/2027, sambamba na kuwajengea uwezo wakulima kukidhi viwango vya kimataifa. Akitembelea mabanda kabla ya ufunguzi, ameielekeza Mamlaka ya Maendeleo ya Biashara Tanzania (TanTrade) kubaini bidhaa zinazohitajika katika masoko hayo na viwango vyake vya ubora ili kuwaongoza wazalishaji.
 
Amesema uzalishaji wa mazao ya bustani umeongezeka kutoka tani milioni 8.44 mwaka 2022/2023 hadi tani milioni 9.78 mwaka 2024/2025, sawa na ongezeko la asilimia 15.9. Kwa upande wa parachichi, uzalishaji umefikia tani 203,473 mwaka 2025/2026, kutoka tani 149,340 mwaka 2020/2021, huku kiasi kinachouzwa nje kikifikia tani 52,593.72 zenye thamani ya Sh bilioni 255.4.
 
Kutokana na fursa hizo, Ndejembi ameielekeza Wizara ya Kilimo kuimarisha uzalishaji wa miche bora, uhifadhi wa mazao na utoaji wa mafunzo ili kuongeza ushiriki wa vijana na wanawake katika kilimo cha parachichi.
 
Aidha, ameitaka wizara hiyo kufufua kilimo cha maua kwa kutumia mashamba yaliyopo Arusha yenye miundombinu ya uzalishaji. Amesema hatua hiyo itasaidia kuongeza mapato ya fedha za kigeni, akikumbusha kuwa maua yaliyozalishwa Arusha hapo awali yalikuwa na soko kubwa duniani.
 
Amepongeza mchango wa Chama cha Wakulima wa Mazao ya Bustani Tanzania (TAHA) katika kuwawezesha wakulima na wajasiriamali, akitolea mfano kampuni ya Onocado Farm. Kampuni hiyo inaongozwa na kijana aliyesaidiwa na TAHA kuingia katika kilimo cha parachichi na sasa anasafirisha nje zaidi ya tani 430 kwa mwaka.
 
Ndejembi amewakaribisha wawekezaji kuwekeza katika uzalishaji, pembejeo, uchakataji, usafirishaji na uhifadhi wa mazao kwa ubaridi. Amesisitiza kuwa kupunguza upotevu wa mazao na kuunganisha uzalishaji na masoko kutasaidia bidhaa kuwafikia wanunuzi kwa wakati, zikiwa na ubora unaotakiwa na kwa gharama zinazowawezesha wakulima na wafanyabiashara kupata faida.
 
Akimkaribisha Makamu wa Rais, Waziri wa Kilimo, Daniel Chongolo, amesema wizara imejizatiti kuendeleza tasnia ya mazao ya bustani ili kuongeza pato la Taifa na mapato ya fedha za kigeni, kwa kuzingatia malengo ya Dira ya Taifa ya Maendeleo 2050.
 
Chongolo amesema wizara, kwa kushirikiana na sekta binafsi, itaendelea kuwawezesha vijana na wanawake kujiajiri kupitia mafunzo na mikopo, sambamba na kuimarisha kilimo cha umwagiliaji na huduma za ugani ili kuongeza tija katika mazao ya chakula na biashara.
 
Kwa upande wake, Makamu Mwenyekiti wa Bodi ya TAHA, Johannes Cornelius Bogers, amesema Tanzania ina fursa nyingi za uwekezaji katika matunda, viungo, maua na mbogamboga. Amesisitiza umuhimu wa upatikanaji wa mitaji na ushirikiano wa Serikali na sekta binafsi ili kuvutia uwekezaji zaidi katika uzalishaji, usafirishaji na masoko.
 
Maonesho ya HortiLogistica Africa 2026 wamehudhuriwa na nchi 45 na yanafanyika Novemba 8 hadi 10 mkoani Arusha, yakiwa na kaulimbiu ya “Kuunganisha Masoko, Kukuza Ustawi”. Yanawakutanisha wakulima, wanunuzi, wasafirishaji, wasindikaji, wawekezaji na watoa huduma za teknolojia kutoka Afrika na masoko ya kimataifa.

RAIS DKT. SAMIA AKUTANA NA KUZUNGUMZA NA WAJUMBE WA KAMATI YA MARIDHIANO YA ZANZIBAR, IKULU JIJINI DAR ES SALAAM

Mhe Dkt. Samia Suluhu Hassan, Rais wa Jamhuri ya Muungano wa Tanzania akiwa kwenye mazungumzo na Wajumbe wa Kamati ya Pamoja ya Majadiliano kuhusu Maridhiano ya Zanzibar, Ikulu Jijini Dar es Salaam, tarehe 09 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania akiwa kwenye picha na Wajumbe wa Kamati ya Pamoja ya Majadiliano kuhusu Maridhiano ya Zanzibar baada ya mazungumzo, Ikulu Jijini Dar es Salaam tarehe 09 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania akiwa kwenye picha na Wajumbe wa Kamati ya Pamoja ya Majadiliano kuhusu Maridhiano ya Zanzibar baada ya mazungumzo, Ikulu Jijini Dar es Salaam tarehe 09 Novemba, 2026. 

MAKAMU WA RAIS KUANZA ZIARA MIKOA MINNE

Makamu wa Rais wa Jamhuri ya Muungano wa Tanzania, Mhe. Deogratius Ndejembi, anatarajiwa kuanza ziara ya kikazi katika mikoa ya Ruvuma, Mtwara, Lindi na Pwani kuanzia tarehe 9 Novemba 2026.

 
Katika ziara hiyo, Mhe. Ndejembi atazungumza na wananchi katika wilaya na vijiji mbalimbali, atakagua miradi ya maendeleo inayotekelezwa na Serikali ya Awamu ya Sita chini ya uongozi wa Rais Dkt. Samia Suluhu Hassan pamoja na kuzindua miradi.
 
Mikoa hii ina nafasi ya kipekee katika uchumi wa Taifa. Ruvuma ni miongoni mwa mikoa inayoongoza kwa uzalishaji wa chakula na kahawa. Mtwara na Lindi ni kitovu cha zao la korosho na gesi asilia, huku Pwani ikiwa mwenyeji wa Bwawa la Kufua Umeme la Julius Nyerere na kitovu kinachokua cha viwanda.  

WADAU MADALE SACCOS IKO HATUA ZA MWISHO ZA USAJILI, WANACHAMA 138 WAMEJIUNGA

Na Mwandishi Wetu , Dar es Salaam

Wadau Madale Saccos iko katika hatua za mwisho za usajili, huku wanachama 138 kati ya wanachama 334 wa Umoja wa Wadau Madale wakiwa wamejiunga na ushirika huo unaotarajiwa kuanza rasmi shughuli zake baada ya kukamilika kwa taratibu za usajili na uchaguzi wa viongozi.

Akizungumza katika mkutano mkuu wa mwaka uliofanyika jana katika ukumbi wa Madale Flamingo, Mgeni Rasmi, Zahra Kamtande kutoka Tume ya Maendeleo ya Ushirika Manispaa ya Kinondoni, alisema zoezi la usajili limefikia takribani asilimia 90 na kwamba nyaraka za chama hicho zimekamilika kwa sehemu kubwa.

Alisema hatua iliyobaki ni kukamilisha taarifa za wanachama katika mfumo wa usajili, ikiwemo majina, namba za NIDA, tarehe za kuzaliwa, idadi ya hisa na namba za simu, ili kupata namba ya malipo na kuendelea na taratibu za uchaguzi wa viongozi.

Kamtande alisema mfumo huo umeanzishwa ili kuhakikisha usajili wa vyama vya ushirika unakuwa wa uhakika na kuondoa uwepo wa vyama visivyo na uhalisia wa wanachama, akiwataka wanachama kuendelea kuwa na uvumilivu wakati taratibu hizo zikikamilishwa.

Aliwapongeza viongozi na wanachama wa Wadau Madale kwa hatua waliyoifikia, akisema mafanikio ya vyama vya ushirika yanatokana na mshikamano, uzalendo na dhamira ya wanachama kukiendeleza chama chao.

Alitoa mfano wa chama cha ushirika cha Tegeta Friendship kilichopo Ununio, ambacho alisema kimepiga hatua kubwa na kufikia uwezo wa kutoa mikopo hadi Sh milioni 50 kwa wanachama wake, akisema mafanikio hayo yanatokana na kujituma na mshikamano wa wanachama.

Kwa upande wake, Mwenyekiti wa Wadau Madale, Stephen Kazimoto, alisema kukamilika kwa usajili kutatoa nafasi kwa chama kuanza rasmi shughuli zake, ikiwemo uchaguzi wa viongozi watakaosimamia maendeleo ya ushirika huo.

Kazimoto alisema wanachama 334 wa umoja huo ni tofauti na wanachama 138 waliojiunga na Saccos, akifafanua kuwa wale ambao hawajakamilisha taratibu za kujiunga watakapofanya hivyo baadaye wataingia kwa utaratibu wa wanachama wapya.

Alionya kuwa baada ya usajili kukamilika, masharti ya kujiunga na Saccos yanaweza kubadilika kulingana na miongozo itakayowekwa na viongozi watakaochaguliwa, ikiwemo kiwango cha kiingilio, hivyo akawahimiza wenye nia ya kujiunga kufanya hivyo mapema.

Kazimoto alisema viongozi wa Saccos wanatarajiwa kupatikana ndani ya mwezi Novemba mwaka huu ili ushirika huo uzinduliwe na kuanza kutoa huduma kwa wanachama wake.

Naye Katibu wa Wadau Madale, Issa Mnasha, akiwasilisha muhtasari wa mkutano mkuu wa mwaka 2025, alisema umoja huo umeendelea kupokea wanachama wapya na kutekeleza shughuli mbalimbali za kijamii, huku kamati za uongozi zikiendelea kusimamia masuala ya umoja, maadili na ustawi wa wanachama.

Mnasha alisema mkutano mkuu wa mwaka 2025 uliridhia kuongeza kiingilio cha wanachama wa umoja kutoka Sh 200,000 hadi Sh 500,000, pamoja na kuweka ukomo wa wanachama 350.

Alisema pia mkutano huo uliridhia matumizi ya Sh 150,000 kwa vikao vya Kamati Kuu na Kamati Tendaji, huku kamati ya maadili na usuluhishi ikisisitiza umuhimu wa wanachama kuheshimiana, kudumisha upendo na kuimarisha umoja.

Mkutano huo pia ulipokea na kujadili taarifa mbalimbali za kamati tendaji, fedha, uongozi, maadili na nidhamu pamoja na burudani na masuala ya kijamii, ukiwa sehemu ya maandalizi ya kuimarisha ushirika wa Wadau Madale katika hatua za mwisho za kukamilisha usajili wa Saccos.

DKT. MWIGULU: SERIKALI IMECHUKUA HATUA BEI YA SARUJI IWE HIMILIVU

WAZIRI MKUU Dkt. Mwigulu Nchemba amesema Serikali imechukua hatua za kufanya bei ya saruji kuwa himilivu kwa kuondoa kodi kwenye saruji inayoagizwa kutoka nje na malighafi zinazotumika kuizalisha.

Waziri Mkuu, Dkt. Mwigulu Nchemba, akihutubia wananchi katika viwanja vya Stendi ya Mwanhuzi, wilayani Meatu, mkoani Simiyu, Novemba 7, 2026. Katika mkutano huo, alisema zaidi ya shilingi bilioni 330 zimeingia kwenye Mfuko wa Barabara ndani ya mwezi mmoja.                                                                                                            

Amesema hayo leo (Jumapili, Novemba 8, 2026), wakati akizungumza na wananchi katika Viwanja vya Shule ya Msingi Nyamikoma, Kata ya Kabita, Wilaya ya Busega, akihitimisha ziara yake ya kikazi mkoani Simiyu.

Dkt. Mwigulu amesema Serikali inatambua kupanda kwa bei za vifaa vya ujenzi, ikiwemo saruji, na imechukua hatua kupunguza gharama zinazochangia bei hizo.

“Tumefuta kodi kwenye saruji inayoagizwa na tumefuta kodi kwenye malighafi zinazotengeneza saruji,” amesema.

Ameeleza kuwa saruji itakayozalishwa kwa malighafi yenye gharama nafuu, pamoja na itakayoagizwa baada ya kuondolewa kwa kodi, inatarajiwa kusaidia kufanya bei kuwa himilivu katika siku zijazo.

Katika hatua nyingine, Waziri Mkuu amewataka watumishi wa umma kuacha kuwanyima wananchi huduma kwa kisingizio cha kutokuwa na miadi, wakati watumishi hao wapo ofisini na wanaweza kuwahudumia.

Amesema baadhi ya wananchi hutumia fedha nyingi kufuata huduma, hivyo kuwataka warudi siku nyingine bila sababu za msingi kunawaongezea gharama na usumbufu.

“Lazima tujue kuzifikia ofisi za umma, baadhi yetu wanakuwa wameingia gharama. Wengine wanatumia zaidi ya laki moja na nusu, wengine laki mbili,” amesema.

Kwa upande wa afya, Dkt. Mwigulu ameelekeza wagonjwa wa dharura, wakiwemo wajawazito waliozidiwa na uchungu na majeruhi, wapatiwe matibabu mara moja bila kucheleweshwa na taratibu za usajili.

“Majeruhi amefika anahitaji huduma ya kwanza ya haraka, mkimbizeni akatibiwe, mtamwandikishia pale pale. Siyo kusubirisha mtu ambaye anahitaji matibabu ya dharura, mnamsubirisha mapokezi,” amesema.

Vilevile, amesisitiza kuwa wagonjwa wanaohitaji kupelekwa hospitali za rufaa hawapaswi kuchangishwa fedha za mafuta ya ambulansi za Serikali.

Amesema Serikali imenunua magari hayo na kuajiri madereva ili yaokoe maisha ya wananchi, hivyo wasimamizi wahakikishe yanakuwa tayari kutoa huduma.

Kuhusu dawa, Waziri Mkuu amevitaka vyombo vya ulinzi na usalama kufuatilia kila mwezi fedha za dawa na matumizi yake, na kuwasilisha taarifa ili hatua zichukuliwe pale uvujaji utakapobainika.

Amehoji sababu za wagonjwa kuendelea kuelekezwa kununua dawa katika maduka binafsi wakati taarifa anazopewa zinaonesha utoshelevu mkubwa wa dawa katika vituo vya Serikali.

Aidha, Dkt. Mwigulu amesisitiza kutoshikilia vitendea kazi vya wananchi, vikiwemo bodaboda, bajaji na magari, kwa makosa ambayo adhabu yake ni faini.

Amesema mamlaka zinazohusika zifuatilie malipo ya faini kwa mujibu wa sheria bila kuzuia shughuli zinazowaingizia wananchi kipato.

“Haya mambo ya kutokujali mitaji ya watu yanarudisha nyuma maendeleo ya watu. Wengine ni mikopo hivyo vitendea kazi vyao,” amesema.

WAZIRI MKUU AITAKA NFRA KUHARAKISHA MAUZO YA MAZAO

WAZIRI MKUU Dkt. Mwigulu Nchemba ameitaka Wakala wa Taifa wa Hifadhi ya Chakula (NFRA) kuharakisha taratibu za kuuza mazao pindi masoko yanapopatikana, ili kuepuka kupoteza fursa hizo kutokana na michakato mirefu.

Vilevile, amezitaka taasisi zinazohusika kuendelea kutafuta masoko ya kudumu na kuwezesha uuzaji wa mazao nje ya nchi, huku akieleza kuwa bei ya kununua mahindi kupitia NFRA imeongezwa kutoka shilingi 450 hadi shilingi 500.

Amesema hayo Bungeni, jijini Dodoma leo (Alhamisi, Novemba 05, 2026), wakati wa kipindi cha maswali ya papo kwa papo kwa Waziri Mkuu, katika Mkutano wa Tano, Kikao cha Nane cha Bunge la 13.

Alikuwa akijibu swali la Mbunge wa Kongwa, Isaya Mngurumi Moses, aliyetaka kufahamu mikakati ya Serikali ya kutafuta masoko na kuboresha bei za mazao ili wakulima wanufaike na uzalishaji wao.

Dkt. Mwigulu amesema NFRA inapopata masoko inapaswa kukamilisha taratibu za mauzo kwa wakati, kwa sababu ucheleweshaji unaweza kuwafanya wanunuzi kupata mazao katika masoko mengine yenye michakato mifupi zaidi.

Amesema Serikali imekuwa ikitumia mazungumzo na viongozi wa mataifa mbalimbali kutafuta masoko ya mazao ya Tanzania na kupanua wigo wa biashara kwa wakulima.

Kuhusu bei ya mahindi, Waziri Mkuu amesema amekutana na Wizara yenye dhamana ya kilimo mara kadhaa kujadili namna ya kuboresha bei ya ununuzi kupitia NFRA.

Amesema bei hiyo iliongezwa kutoka shilingi 200 hadi shilingi 300, baadaye shilingi 450 na sasa shilingi 500.

“Tulikaa tena kwa mara ya mwisho, tukashauriana kwamba kama bado wanaweza kwenda juu zaidi, wafanye hivyo, na tulikubaliana sasa watapeleka iwe shilingi 500,” amesema.

Amewataka wakulima wenye mahindi wanayohitaji kuuza kufika katika ofisi za NFRA za mikoa na kanda ili kutumia fursa ya bei hiyo iliyoboreshwa.

Hata hivyo, amesema NFRA huenda isiweze kununua mahindi yote, hivyo jitihada za kupanua masoko na kuwezesha mauzo nje ya nchi zinapaswa kuendelea.

Katika hatua nyingine, Waziri Mkuu amewaelekeza Wakuu wa Mikoa kuchukua hatua kali dhidi ya watu wanaopeleka mifugo katika mashamba ya wakulima bila ridhaa yao, akisisitiza kuwa Serikali haitakubali uvunjaji wa sheria wa makusudi.

Akijibu swali la Mbunge wa Nachingwea, Fadhili Ally Liwaka, kuhusu migogoro ya wakulima na wafugaji, amesema hatua zinapaswa kuchukuliwa dhidi ya mtu aliyefanya kosa, bila kugeuza tukio hilo kuwa mgogoro kati ya jamii.

“Kama mmoja amefanya kosa hilo, achukuliwe hatua kali huyo huyo. Wala wakulima wasione wafugaji ni adui zao, na wala wafugaji wasione wakulima ni adui zao,” amesema.

Amewataka wananchi kuepuka kujichukulia sheria mkononi na badala yake kutumia vyombo vya sheria kutafuta haki.

Vilevile, amewaelekeza viongozi katika ngazi mbalimbali kuimarisha mipango ya matumizi bora ya ardhi na kusitisha ugawaji wa maeneo kinyemela. Amesema rushwa, matumizi mabaya ya ofisi na ugawaji wa ardhi usiofuata taratibu vinachochea migogoro katika jamii.

Kuhusu huduma za afya, Waziri Mkuu amesema Serikali itafanya uandikishaji wa awamu ya pili wa bima ya afya kwa wote ili kuendelea kuyafikia makundi ambayo bado hayajafikiwa.

Akijibu swali la Mbunge wa Viti Maalum, Stella Alex Ikupa, kuhusu matibabu kwa watu wenye ulemavu ambao bado hawajafikiwa na mpango huo, amezitaka taasisi za afya kuendelea kuwahudumia kupitia dirisha la msamaha wa matibabu.

“Pasitokee mtu kukosa matibabu kwa sababu ya hali yake ya ulemavu ama hali yake ya kifedha,” amesema.

Amewahimiza pia Watanzania kuendelea kujisajili katika mfumo wa bima ya afya kwa wote, akisisitiza kuwa mpango huo unalenga wananchi wote, wenye kipato na wasio na kipato.

WMA KUSIMAMIA USAHIHI WA VIPIMO KATIKA UZALISHAJI NA BIDHAA VIWANDANI.

 

Wakala wa Vipimo Tanzania (WMA) umeeleza kuwa unaendelea kuimarisha usimamizi na ukaguzi wa vipimo vinavyotumika viwandani na katika shughuli za biashara ili kuhakikisha wazalishaji na wafanyabiashara wanazingatia matakwa ya Sheria ya Vipimo, hatua inayolenga kulinda haki za wanunuzi na wauzaji pamoja na kujenga mazingira ya biashara yenye usawa.

Akizungumza wakati wa uzinduzi wa Sera ya Maendeleo ya Viwanda ya mwaka 2025 na sera ya jasiriamali ndogo na za kati Jijini Dodoma, Afisa Mtendaji Mkuu wa WMA, Alban Kihulla, amesema wakala huo unashirikiana na viwanda na wajasiriamali kuhakikisha mizani ya kupimia inavyotumika katika shughuli zao inakaguliwa na kuhakikiwa kwa mujibu wa Sheria ya Vipimo, Sura ya 340.

Amesema katika shughuli za viwandani, WMA itasimamia matumizi sahihi ya mizani mikubwa inayotumika kupimia malighafi, vifaa vya kupimia mafuta na pampu za mafuta ili kuhakikisha kiasi kinachopimwa kinaendana na kiwango halisi kinachotakiwa katika miamala ya kibiashara.

Aidha, amesema wakala huo utaendelea kukagua bidhaa zilizofungashwa kwa kuzingatia matakwa ya kisheria kuhusu vipimo, ikiwemo kuhakikisha kiasi cha bidhaa kinachotajwa kwenye kifungashio kinaendana na uzito au ujazo halisi uliomo, pamoja na kusimamia vipimo vya urefu na vipimo vingine vinavyotumika katika biashara.

Kwa upande wa wajasiriamali wadogo na wa kati, Kihulla amesema WMA imeongeza utoaji wa elimu kuhusu umuhimu wa kutumia mizani na vifaa vingine vya kupimia vilivyohakikiwa kisheria, akibainisha kuwa matumizi ya vipimo visivyo sahihi yanaweza kusababisha mmoja wa wahusika katika biashara kupata hasara na kuathiri uaminifu baina ya wafanyabiashara na wateja.

Ameongeza kuwa matumizi ya vipimo sahihi ni muhimu katika kuweka mazingira ya ushindani wa haki, kulinda maslahi ya watumiaji na kuhakikisha wafanyabiashara wanapata stahiki zao kulingana na kiasi cha bidhaa wanachouza au kununua.

Katika hatua nyingine, amesema WMA itaendelea kushirikiana na Shirika la Kuhudumia Viwanda Vidogo (SIDO) na Mamlaka ya Elimu na Mafunzo ya Ufundi Stadi (VETA) kuwawezesha vijana kutumia ujuzi wao kubuni na kutengeneza vifaa vya vipimo nchini, badala ya kutegemea kwa kiwango kikubwa vifaa vinavyoagizwa kutoka nje.