MOBISOL YAFUNGUA KITUO CHA KUSAMBAZA UMEME BAGAMOYO

Mwakilishi wa Mkuu wa Wilaya ya Bagamoyo,Bw.David Kaijunga ambaye ni Afisa Misitu wa Wilaya hiyo akikata utepe kuzindua kituo cha mauzo cha kampuni inayotoa umeme wa jua ya Mobisol Tanzania mwishoni mwa wiki.

Mwakilishi wa Mkuu wa Wilaya ya Bagamoyo,Afisa Mazingira na Misitu wa wilaya ya Bagamoyo,Bw.David Kaijunga(kulia) akipata maelezo baada ya kuzindua kituo cha mauzo na usambazaji cha Mobisol kutoka kwa msimamizi wa tawi la Mobisol Bagamoyo  Gladness Mlalatu.

Mwakilishi wa Mkuu wa Wilaya ya Bagamoyo David Kaijunga (kushoto)  akiongea  mara baada ya Kuzindua ofisi ya  Mobisol wengine pichani kutoka kulia ni Meneja Maendeleo wa kampuni hiyo, Saad Lattf, Ofisa Mkuu Mwendeshaji Henrik Axelsson na Meneja  Mauzo Tanzania  Joseph Zikheli. 

 Mwenyekiti wa Bodi ya  na Mshauri wa Kampuni ya Mobisol akihutubia wageni waalikwa.

BOFYA HAPA KUSOMA ZAIDI

Ofisa Mkuu Mwendeshaji wa Kampuni ya Mobisol, Henrik Axelsson (kushoto) akimuonyesha  Afisa Maliasili na Mazingira wa wilaya ya Bagamoyo, David Kaijunga  (Kulia) moja ya Televisheni inayotumia  umeme wa jua unaosambazwa na kampuni hiyo, wakati wa hafla ya uzinduzi wa ofisi zake Wilayani Bagamoyo mwishoni mwa wiki,wengine pichani ni maofisa wa kampuni hiyo.

Baadhi ya wafanyakazi wa Kampuni ya Mobisol  wakiwa katika hafla ya uzinduzi wa ofisi za kampuni hiyo Wilayani Bagamoyo.

*************

Kampuni ya Mobisol Tanzania inayozalisha nishati ya umeme wa jua kwa kutumia teknojia za kisasa zilizobuniwa nchini Ujerumani mwishoni mwa wiki imefungua kituo cha kutoa huduma zake mjini Bagamoyo mkoani Pwani.

Uzinduzi wa kituo hicho ni mwendeleo wa kampeni ya “Maisha ni Bora Zaidi na Mobisol”  ambayo imelenga kuwawezesha wananchi wengi wanaoishi maeneo ya vijijini ambako bado kuna tatizo la nishati ya umeme kuunganishwa na umeme unaotumia nishati ya jua unaopatikana kwa gharama nafuu na wa teknolojia ya kisasa ambapo kwa sasa watawezeshwa kufanya malipo ya kupata huduma hii kwa awamu.

Akiongea juu ya kampeni hii,Meneja Masoko wa Mobisol Tanzania, Allan Rwechungura amesema kuwa kampeni imelenga kuboresha maisha ya wananchi wanaoishi maeneo ya vijijini ambako bado umeme wa gridi ya Taifa haujawafikia,ambako kwa sasa wataweza kufurahia maisha kwa kutumia umeme unaotokana na nishati ya jua ambao wataupata kwa gharama nafuu wanayoweza kuimudu.

“Kampeni hii ni moja ya mkakati wetu wa kuunga mkono jitihada za serikali za kusambaza umeme wa gharama nafuu maeneo ya vijijini na ndio maana tumepunguza gharama za kujiunganisha na mtandao wetu ikiwemo kuweka mpango maalumu wa kulipia kwa awamu ili wananchi wengi wanufaike na huduma hii muhimu na kuboresha maisha yao”.Alisema Rwechungura.

Alifafanua kuwa mpango mpya wa malipo ya kupata huduma za Mobisol mteja anatakiwa kulipia shilingi 999 kwa siku ambapo akikamilisha malipo atapata umeme wa uhakika wenye nguvu zinazoanzia  80W hadi kufikia 200W kulingana na mahitaji yake ambapo ataweza kuutumia kwa vifaa vya nyumbani pia kampuni inatoa ofa ya kufuatilia iwapo wateja wake wanapata huduma ya uhakika na iwapo kunakuwepo na matatizo yanarekebishwa na wataalamu wake waliobobea katika ufundi wa mitambo inayozalisha umeme wa jua.

Pia  Rwechungura alisema kuwa lengo kubwa la kutoa punguzo hili ni kuwawezesha watoto wanaoishi maeneo ya vijijini kujisomea katika mazingira bora wakiwa na nishati ya umeme pia unapunguza uharibifu wa mazingira ikiwemo pia kuwawezesha wakazi wa vijijini kuboresha maisha yao kwa kufanya shughuli mbalimbal za uzalishaji zinazohitajika kutumia nishati ya umeme.

Katika mkakati wa mwaka huu wa kusogeza huduma zake vijijini mikoa itakayofikiwa aliitaja kuwa mbali na Tabora ni Kagera,Dodoma, na mikoa mingineyo.Hadi mwishoni mwa mwaka jana zaidi ya familia 35,000 nchini Tanzania na Rwanda zilikuwa zimeunganishwa na nishati ya umeme wa gharama nafuu wa nishati ya jua wa Mobisol.