NDOVU SPECIAL MALT YASAIDIA ULINZI WA TEMBO

 Meneja wa bia ya ndovu special Malt Bi Pamela Kikuli  kulia akikabidhi baadhi ya vifaa mbalimbali vya kusaidia kupambana na ujangili wa mauwaji wa Tembo nchini. Anaepokea ni katikati ni mkuu wa kitengo cha Ulinzi na upambanaji wa Ujangili toka hifadhi ya Serengeti Ndugu Agrikola Luhiru na kushoto ni meneja Mahusiano wa TANAPA Pascal Shelutete

Meneja Mahusiano wa TANAPA Pascal Shelutete akizungumza na waandishi wa habari wakati akipokea vifaa vya kupambana na ujangili wa Tembo toka kwa bia ya Ndovu special Malt ambavyo ni Trimble GPS na Darubini (Binoculars) Kulia ni Meneja wa bia ya Ndovu Special Malt Pamela kikuli.

Bia maarufu ya Ndovu Special Malt leo imefungua ukurasa mwingine ikiwa ni muendelezo wa harakati zake za kusaidia kuimarisha ulinzi wa Tembo wetu hapa nchini. Bia hii ya Ndovu Special Malt ambayo pia imebeba jina la mnyama huyu adhimu “Ndovu” anayekabiliwa na tishio kubwa la kutoweka duniani kufuatia uwindaji haramu na ujangili uliokithiri, imedhamiria kufanya kila linalowezekana katika kumlinda mnyama huyu.

Akizungumza katika mkutano na waandishi wa habari jijini dar es salaam, meneja wa bia ya Ndovu Bi. Pamela Kikuli alisema; Bia ya Ndovu Special Malt imeweka mikakati na dhamira kubwa kuhakikisha tunamlinda mnyama huyu Tembo kwa njia yoyote ile. Huu ni urithi wetu na vizazi vijavyo, na pia ni fahari ya Taifa letu kama ilivyo bia hii ya Ndovu, hivyo tukiacha mnyama huyu akatoweka tutapoteza fahari ya taifa letu na urithi wetu. Kwa kulitambua hilo, Bia ya Ndovu imeamua kuwa mstari wa mbele kuhakikisha Tembo wetu wanalindwa kwa kila itakavyowezekana.

Kama mtakumbuka mwaka jana bia ya Ndovu iliendesha kampeni ya kumlinda tembo dhidi ya majangiri kupitia mitandao ya kijamii na kuwazawadia watu walioshiriki katika kampeni hiyo zawadi ya kwenda kujionea makundi ya Tembo katika hifadhi ya Selou na kusaidia Asasi moja inayojihusisha na ulinzi wa Tembo. Mwaka huu tumekwenda mbali zaidi na kuamua kutoa vifaa muhimu kabisa vinavyosaidia katika ulinzi wa Tembo wetu, tunatoa viona mbali au Darubini (Binoculars) 20 na vifaa makini vya utambuzi wa mahala walipo tembo (Trimble GPS) 5, ili kuimarisha doria dhidi ya majangiri hawa. Tuna imani kubwa kuwa vifaa hivi vitasaidia sana katika ulinzi wa Tembo wetu na hivyo kutimiza malengo yetu. Alisema Pamela.

Akiongelea juu ya hatari inayolikumba taifa letu kwa jinsi Tembo wanavyoteketea kwa kasi Pamela alisema; TBL tumeona jinsi Tembo wetu wanavyoteketea kwa kasi hapa Tanzania na Afrika kwa ujumla, ili kuokoa hali hii tukaipa jukumu Bia yetu iliyobeba jina hili lenye ufahari wa pekee, bia ya Ndovu kuchukua jukumu la ulinzi wa myama huyu. Katika kutekeleza hayo tunawashirikisha wananchi na wapenzi wa bia hii katika zoezi hili kupitia mitandao ya kijamii. Mwaka huu tumeshirikiana na uongozi wa TANAPA na wenzetu wa Serengeti National Park kuona ni jinsi gani tutaimarisha doria katika hifadhi zetu. Na tunaahidi kuwa kampeni hii ni endelevu hadi tuhakikishe mafanikio yamepatikana.

Nae Meneja Uhusiano wa Tanapa Bw. Pascal Shelutete alisema; TBL kupitia bia yake hii ya Ndovu Special Malt, imekuwa mstari wa mbele katika ulinzi wa Tembo wetu. Wote sisi ni mashuhuda wa mchango ambao Bia ya Ndovu  inautoa katika kuhakikisha Tembo wetu wanakuwa salama, lakini pia kuwahamasisha watanzania wengine kujenga dhamira ya kuwalinda wanyama hawa wakubwa, wapole na wa kuvutia. Vifaa walivyotupatia leo, ni miongoni mwa vifaa muhimu sana katika ulinzi wa wanyama wetu. Hivyo tunawashukuru sana na kuomba waendelee na moyo wao huu wa kizalendo. Nichukue nafasi hii pia kuwaomba makampuni na taasisi nyingine kuiga mfano huu bora wa TBL.

Nae mkuu wa kitengo cha kudhibiti ujangili toka hifadhi ya Serengeti, Bw. Agrikola Luhiru alisema; vifaa hivi ni muhimu sana katika doria zetu, vinarahisisha kazi yetu na kutupa uwezo wa kutambua walipo tembo muda wowote na kuweza kuwafuatilia kwa umakini. Lakini pia kuwaona majangiri hata kama watakuwa umbali mrefu na kuwadhibiti. Tunaahidi kuvitumia vifaa hivi kwa malengo yaliyokusudiwa  na si vinginevyo. Nami napenda niongeze shukurani zangu za dhati kwa niaba ya hifadhi ya Serengeti kwa wenzetu hawa wa Ndovu Special Malt kwa dhamira hii nzuri ya kulinda Tembo wetu. Alisema Luhiru.