MAPATO YA UWANJA WA TAIFA HUINGIA SERIKALI KUU: NAIBU WAZIRI MAKALLA

Na Benedict Liwenga-Maelezo, Dodoma

Fedha zote zinazokusanywa kutokana na Michezo kupitia Wizara ya Habari, Vijana, Tamaduni na Michezo zinatumiwa kwa watanzania wote kutokana na kuchangia kwenye mfuko Mkuu wa Serikali.

Akijibu swali bungeni kwa niaba ya Waziri wa Habari, Vijana, Tamaduni na Michezo, Naibu Waziri wa Wizara hiyo, Mhe. Amos Gabriel Makalla amesema kuwa mapato yanayokusanywa kutokana na shughuli mbalimbali zizazofanywa na Wizara hiyo ikiwemo za Uwanja wa Taifa hutumiwa na serikali katika huduma mbalimbali kwa wananchi wa Tanzania.

Mhe. Makalla alikuwa akijibu swali lililoulizwa na Mhe. Philipa Geofrey Mturano (Viti Maalumu) ambaye alitaka kujua wilaya ya Temeke ambayo ndiyo mwenyeji wa Uwanja wa Taifa inanufaikaje na mapato yatokanayo na uwanja huo.

Amesema wilaya ya Temeke hunufaika na mapato yatokanayo na matumizi ya Uwanja wa Taifa ambayo huingia kwenye mfuko Mkuu wa Serikali. Mapato hayo yanatokana na asilimia kumi na nane (18%) ambayo ni kodi ya ongezeko la thamani (VAT) inayokatwa kwa kila mchezo unaochezwa na kupelekwa TRA na pia gawio la asilimia kumi na tano (15%) ambazo hukatwa kama ada ya matumizi ya uwanja.

“Mapato yote hayo hutumiwa na serikali katika kutoa huduma mbalimbali kwa wananchi wa Tanzania ikiwa ni pamoja na Manispaa ya Temeke”. Alisema Naibu Waziri.

Makalla amebainisha kuwa tangu Uwanja wa Taifa uanze kutumika mwezi Agosti, 2007 hadi kufikia mwezi Februari mwaka huu, ulikuwa umeingiza shilingi 1,533,697,666 kwa makusanyo yanayopitia Wizara ya Habari, Vijana, Tamaduni na Michezo ambazo hizo ni nje ya mapato yanayokusanywa kupitia kodi ya ongezeko la thamani (VAT) yanayowasilishwa na Shirikisho  la Mpira wa Miguu nchini (TFF).

Kuhusu kuwepo na mianya ya rushwa, ufisadi na upotevu katika makusanyo ya mapato, Naibu Waziri Makalla amesema Wizara yake itafuatilia lakini pia serikali itaunda mbinu mpya za kukagua tiketi wakati wa michezo.

Licha za serikali kukabiliana na changamoto nyingi katika sekta ya michezo kama vile uchakavu wa miundo mbinu ikiwemo viwanja mbalimbali vya michezo hapa nchini, serikali imejipanga vema katika kuhakikisha kuwa changamoto hizo zinapungua ama kwisha kabisa na pia inaandaa mbinu mbalimbali za kuepusha mianya ya rushwa kujitokeza katika sekta ya michezo.