Mvua kunyesha mikoa 8 ya Ukanda wa Pwani

MVUA kubwa zinataraji kunyesha katika kipindi cha saa 24 kila siku katika mikoa nane nchini kuanzia leo Aprili 30 hadi Mei 4, mwaka huu.

Kwamujibu wa taarifa iliyotolewa leo Aprili 30, 2012 Asubuhi na Mamlaka ya Hali ya Hewa Tanzania (TMA), zinasema kuwa mvua hiyo kubwa ya zaidi ya milimita 50 itanyesha kila siku katika siku hizo zilizotajwa katika maeneo mbalimbali ya mikoa 8 nchini ya ukwanda wa Pwani.

Aidha TMA hiyo inasema kuwa kiwango cha uhakika cha mvbua zitakazo nyesha katika mikoa ya Dar es salaam, Mtwara, Lindi, Tanga, Morogoro, Pwani na visiwa vya Unguja na Pemba itakuwa ni asilimia 80.

TMA inaeleza kuwa mvua hizo ni kutokana na kuimarika kwa mgandamizo mdogo wa  hali ya hewa katika maeneo ya Bahari ya Hindi yanayopakana na Pwani ya Kaskazini.

Kufuatia mvua hizo TMA wanasema upo uwezekano mkubwa wakutokea Mafuriko, Tsunami, upepo mkali, mchafuko wa bahari na maziwa, vimbunga , Baridi kali au joto.

Tahadhari kubwa imetolewa kwa wakazi wote wanaoishi maeneo hatarishi kama mabondeni na karibu na mito mikubwa kwani panauwezekano mkubwa wa kutokea mafuriko kufuatia mvua hizo.

Pia tahadhari hiyo itawahusu watumiaji wa Bahari na nchi kavu na kutakiwa kuchukua tahadhari juu ya athari zitokanazo na mvua hizo.

TMA pia imezitaka taasisi zinazohusika na maafa kuchukua hatua stahiki mapema kabola ya madhara makubwa kutokea na kuikumba jamii.

Mamlaka itaendelea kufuatilia mifumo ya hali ya hewa na kutoa taarifa kila inapobidi.