WANANCHI WAOMBA MASOKO YA KUDUMU SAME

Na Mwandishi wetu ..Same

Wananchi wa Kata za Bangala, Chome, na Mshewa, wilayani Same, mkoani Kilimanjaro, wameiomba Serikali na wadau mbalimbali kuwajengea masoko ya kudumu ili waweze kufanya biashara zao katika mazingira salama, hasa wakati huu wa mvua kubwa zinazonyesha mfululizo.

Wananchi hao wamesema changamoto ya kukosekana kwa masoko ya kudumu imekuwa kikwazo kikubwa kwa maendeleo yao, kwani wanauza bidhaa katika maeneo yasiyo rasmi, jambo ambalo linasababisha hasara kubwa. 

Wameeleza kuwa mvua zinaponyesha, bidhaa zao kama vile mazao ya kilimo, matunda, na mboga mboga zinaharibika, hivyo kupunguza kipato wanachotegemea kutoka kwenye biashara hizo.

Wakizungumza wakati wa ziara ya Mbunge wa Same Magharibi, Dkt. David Mathayo, wananchi hao walitoa ombi la dhati kwa Serikali kuingilia kati na kuharakisha ujenzi wa masoko hayo.

Cuthbert Wilfred, mfanyabiashara wa mazao ya kilimo kutoka Kata ya Bangala, alisema:

"Hali ni mbaya sana. Tunakosa maeneo ya uhakika ya kuuza bidhaa zetu. Tunauza chini ya miti au barabarani, na mvua ikinyesha, kila kitu kinaharibika."

Rehema Mshana, mama wa watoto watatu kutoka Chome, aliongeza:

"Ni vigumu sana kwa sisi wanawake. Tunategemea biashara hizi kuendesha familia, lakini mvua zimetufanya maisha kuwa magumu zaidi. Tunaomba Serikali isikie kilio chetu."

Diwani wa Kata ya Mshewa, Gaitan Mkwizu, alieleza kuwa juhudi za awali zimeanza kwa kushirikiana na wananchi, lakini wanahitaji msaada zaidi kutoka kwa Serikali na wahisani ili kukamilisha masoko hayo.

 Alisema kuwa ujenzi wa masoko ya kudumu utasaidia si tu kuokoa bidhaa za wafanyabiashara, bali pia kuboresha uchumi wa eneo hilo.

Mbunge wa Same Magharibi, Dkt. David Mathayo, aliguswa na changamoto hizo na kuchukua hatua za haraka ambapo alichangia  msaada wa vifaa vya ujenzi, vikiwemo mabati, saruji, na mbao, ili kukamilisha ujenzi wa baadhi ya masoko ambayo tayari yapo kwenye hatua za awali.

"Nimeona hali halisi na nimeguswa na changamoto hizi. Kama kiongozi, sitawaangusha wananchi wangu,Natoa msaada huu na nitahakikisha masoko haya yanakamilika kwa wakati," alisema Dkt. Mathayo.

Viongozi wa wananchi walimpongeza mbunge huyo kwa juhudi zake za kuwasaidia na wakiahidi kushirikiana naye kikamilifu kuhakikisha masoko yanakamilika kwa manufaa ya wote.

Wananchi wanatumai kuwa msaada huo utakuwa chachu ya kuboresha maisha yao na kuongeza ufanisi wa shughuli za kiuchumi katika wilaya ya Same.