MAPIGANO HAYA YA WAKULIMA NA WAFUGAJI YAKOMESHWE

MIONGONI mwa vitu ambavyo huwa si vipendi na huniumiza ni migogoro baina ya mkulima na mfugaji sehemu yeyote ile nchini.

Katika hali ya kawaida mkulima na mfugaji ni mtu mmoja, kwa uhalisia wa kawaida hasa katika vijiji tulivyozaliwa na kukulia. Vijijni ni lazima ufuge kuku au mbuzi kama si Ng'ombe.

Huenda hii inanitokea kwakua nami nimezaliwa katika nyumba ya mkulima lakini pia aliyekuwa anafuga mifugo mingi tu kipindi hicho lakini kwa sasa imebaki historia kutokana na wizi uliokuwa umekithiri wa mifugo kipindi hicho.

Mbaya zaidi migogoro mingi baina ya mkulima na mfugaji inatokea mara kwa mara Mkoani Morogoro tena Wilaya ya Mvomero ambayo tena mimi ni mkazi wake na mzaaliwa wa Wilaya hiyo nikitokea pale Kijiji cha Kinyenze, Kata na Tarafa ya Mlali.

Binafsi nilishuhudia mara kadhaa wazazi wangu wakilipa faini baada ya mifugo yetu kula mazao ya watu pindi ikienda malishoni na wakati mwingine ni mimi nilihusika nilipokuwa nachunga.

Namshukuru Mungu sana kwani matukio hayo yalikuwa yakitokea mara chache na majirani zetu walikuwa ni watu waungwana sana kwani mbali na kulipa faini hakuna baya zaidi ambalo lilikuwa likitokea kipindi hicho zaidi ya baba kumkata mshahara mchungi au mimi kulamba mijeledi kwa kuachia  Ng'ombe au Mbuzi wakala mazao ya watu.

Hali  siku hizi ni tofauti kabisa wafugaji na wakulima wa siku hizi nadhani wamekuwa wakorofi na kutotaka suluhu pindi matatizo kama hayo yanapotokea.

Lakini pia si wakulima na wafugaji tu, viongozi wetu hasa wa kisisiasa nao huchangia kwa kiasi fulani kutokea kwa migogoro hii baina ya makundi haya mawili katika jamii.

Mwanasiasa katika kutaka kulinda kura na maslahi yake ya kuendelea kutawala na kuonekana mwema, huenda na kuwahakikishia kuwa kundi  moja kuwa hapa ni kwenu na hugeukia kundi lingine na kusema hapa ni kweni sasa kila mmoja akijazwa jeuri matokeo yake mwisho wa siku ni kukamatana mashati. KUSOMA ZAIDI POROJO HII BOFYA HAPA

Juzi vyombo vya habari viliripoti juu ya mapigano baina ya wakulima na wafugaji yaliyotokea Kijiji cha Dihinda Kata ya Kanga Wilaya ya Mvomero Mkoa wa Morogoro ambapo mkulima mmoka aliuwawa kwa mkuki na Ng’ombe 71 kukatwa mapanga na kufa.

Aidha, katika tukio hilo lililotokea Desemba 12, watu wanne akiwemo askari mmoja wa Jeshi la Polisi walijeruhiwa na wamelazwa katika Hospitali ya Misheni ya Bwagala mjini Turiani wakiendelea kupatiwa matibabu.

Mwenyekiti wa Kijiji hicho, Rajabu Kilama alisema mapigano hayo yalitokea baada ya ng’ombe 162 kuingia katika shamba la kunde la Bakari Mlunguza na kuharibu zao hilo.

Hii si mara ya kwanza kutokea kwa mapigano ya aina hiyo Wilayani Mvomero na mara kwa mara imekuwa ikitokea katika vijiji vya Kambala, Merela na Mgongolwa na mara zote kama si vifo vya wakulima basi ni majeruhi na vifo vya mifugo.

Mapigano hayo yamekuwa si yakipooteza uhai wa watu lakini hofu inayokuwepo miongoni mwa wananchi dhidi ya makundi mengine imekua ikiathiri uzalishaji mali.

Wananchi wamekuwa wakishindwa kwenda mashambani kulima kuhofia kushambuliwa na wafugaji, lakini pia wanafunzi nao wakishindwa kwenda shule, hivi sasa wananchi wa Kijiji hicho cha Dihinda wamekihama kutokana na hofu.

Licha ya tawala zilizopita nchi hii nazokutoa ahadi za mara kwa mara za kumaliza migogoro hiyo lakini pia Rais John Magufuli nae katika kipindi cha kampeni aliahidi kumaliza tatizo hilo na kutoa salamu kwa watendaji atakao wachagua yeye wakishindwa kumaliza migogoro hiyo nini kitawapata.

Septemba 30 mwaka huu, Magufuli akihutubia wakazi wa Kibaigwa wilayani Kongwa katika Mkoa wa Dodoma, alisema  viongozi atakaowateua kuanzia makamanda wa polisi, wakuu wa wilaya na mikoa, wawe macho vinginevyo, ikitokea mapigano katika maeneo yao, hawatakuwa na kazi.

“Viongozi nitakaowateua wawe wakuu wa mikoa, wakuu wa wilaya, katibu tarafa, makamanda wa polisi wa mikoa, wakuu wa polisi wa wilaya ikitokea mapigano kwenye eneo lake, siku hiyo kazi anaondoka nayo,” alisema Magufuli.

Sitaki hii leo kuwachongea viongozi wote ambao walichaguliwa na Rais waliopo hapo Mvomero na mkoa wa Morogoro kuwa wameshindwa kudhibiti mapigano katika eneo lao bali ni kuwakumbusha kutembelea maeneo hayo mara kwa mara na kusikia kero zilizopo kutoka kwa wananchi.

Naimani kuwa kabla ya mapigano kutokea ipo hali ya muda mrefu ya mvutano baina ya pande hizo mbili na yanapozidi ndio ushambuliana.

Hivyo mamlaka zilizopo Mvomero kama zitajenga utamaduni wa kupata taarifa za mara kwa mara zinazotokea huko vijijini basi ni rahisi kutatua migogoro hiyo mapema kuliko kusubiri yatukie ndipo watoe pole.

Nivyema sasa Waziri wa Kilimo, Mifugo na Uvuvi, Mwigulu Nchemba kukaa chini na kuandaa mikakati madhubuti kwa kushirikiana na watendaji wote wa serikali na wananchi ili kunusuru mapigano mengine kutokea.

Mkakati huo uwe shirikishi na usilenge tu Mvomero bali nchi nzima ili kumaliza kabisa mapigano ya namna hiyo yanayoweza kutokea nchini.