TFDA YAFANYA WARSHA YA SIKU MBILI KUHUSU UTEKELEZAJI WA KAZI ZA UFUATILIAJI WA MADHARA YATOKANAYO NA MATUMIZI YA DAWA

 Meneja Idara ya Majaribio na Usalama wa Dawa wa TFDA, Bi. Kissa Mwamwitwa  (aliyesimama), akimtambulisha Mgeni Rasmi, Kaimu Mganga Mkuu wa Mkoa wa Morogoro, Dkt. Samson Tarimo (katikati) aliyemwakilisha Mkurugenzi Mkuu wa TFDA (Bw. Hiiti B. Sillo), katika ufunguzi wa Warsha husika  kwa washiriki (hawapo pichani). Kulia ni Mshauri wa Masuala ya Afya na Mipango (Public Health Logistics Advisor) wa Shirika  Lisilo la Kiserikali la Kimataifa la JSI Bi. Elika Mmari.

**************

Mamlaka ya Chakula na Dawa kwa kushirikiana na Shirika lisilo la Kiserikali la Kimataifa la John Snow Inc (JSI) wameandaa warsha ya siku mbili kuhusu maendeleo ya utekelezaji wa Uhamasishaji, Uelimishaji na Ufuatiliaji wa karibu wa utoaji taarifa za madhara yanayohisiwa kusababishwa na dawa katika mikoa minne (4) ya majaribio ya Dodoma, Singida, Tabora na Kigoma.

Warsha hiyo imehusisha wataalam wa sekta ya afya zaidi ya 30 kutoka Wizara ya Afya na Ustawi wa Jamii, TFDA, JSI, Christian Social Services Commission (CSSC), Elizabeth Glaser Pediatric AIDS Foundation (EGPAF) na wawakilishi kutoka mikoa saba ya Tabora, Dodoma, Singida, Kigoma, Kilimanjaro, Mwanza na Dar es Salaam ambao kwa pamoja walijadili mada zilizowasilishwa kuhusu uzoefu uliopatikana kutoka katika mikoa minne iliyofanyiwa majaribio, changamoto zake na jinsi ya kukabiliana nazo ili kuleta ufanisi wa kazi hiyo katika mikoa yote kwa lengo la kulinda afya ya jamii.

Mgeni Rasmi katika ufunguzi wa warsha hiyo alikuwa ni Kaimu Mganga Mkuu wa Mkoa wa Morogoro, Dkt. Samson Tarimo ambaye alimwakilisha Mkurugenzi Mkuu wa TFDA Bw. Hiiti B. Sillo.

Aidha. wilaya za Kibondo, Urambo, Kondoa na Iramba zilipata tuzo za vyeti kwa kukusanya taarifa nyingi kuliko wilaya nyingine zilizokuwa katika mradi wa majaribio hayo. Vyeti hivyo vilitolewa na Mgeni Rasmi ambaye aliwakilisha Wizara ya Afya na Ustawi wa Jamii katika ufungaji wa warsha hiyo,  Bw. Dikson S. Kejo.

 Baadhi ya washiriki katika Warsha hiyo wakifuatilia kwa makini hotuba ya ufunguzi kutoka kwa Mgeni Rasmi (hayupo pichani).

Afisa Programu na Utawala wa Usambazaji kutoka Shirika Lisilo la Kiserikali la Kimataifa la Elizabeth Glaser Pediatric AIDS Foundation (EGPAF), Bw. Brendan Lyimo (aliyesimama) akiwasilisha mojawapo ya mada kwa washiriki.

Mshauri wa Masuala ya Afya na Mipango (Public Health Logistics Advisor) wa Shirika  Lisilo la Kiserikali la Kimataifa la JSI Bi. Elika Mmari akionesha washiriki (hawapo pichani), mojawapo ya vielelezo vinavyotumika katika kuelimisha na kuhamasisha ukusanyaji wa taarifa zinazohisiwa kusababishwa na madhara yatokanayo na matumizi ya dawa.

Mgeni Rasmi katika sherehe za kufunga warsha husika, kutoka Wizara ya Afya na Ustawi wa Jamii, Bw. . Dikson S. Kejo (aliyesimama nyuma kulia) akimkabidhi mmojawapo wa washiriki,  tuzo ya cheti kwa kufanya vizuri katika ukusanyaji wa taarifa zinazohisiwa kusababishwa na madhara yatokanayo na matumizi ya dawa.

Washiriki wakiwa katika picha ya pamoja wakati wa ufunguzi wa Warsha husika. Waliokaa, ni Mgeni Rasmi Kaimu Mganga Mkuu wa Mkoa wa Morogoro, Dkt. Samson Tarimo (katikati), Mwakilishi kutoka Wizara ya Afya na Ustawi wa Jamii, Bw. Dikson S. Kejo (wa pili kutoka kulia), Mshauri wa Masuala ya Afya na Mipango (Public Health Logistics Advisor) wa Shirika  Lisilo la Kiserikali la Kimataifa la JSI Bi. Elika Mmari (kulia) na Meneja Idara ya Majaribio na Usalama wa Dawa wa TFDA, Bi. Kissa Mwamwitwa (wa pili kushoto).