Castle Lite ‘yawabeba’ Watanzania kwa Timbaland

Meneja wa bia ya Castle Lite, Victoria Kimaro kulia akizungumza na waandishi wa habari jijini Dar Es Salaam juu ya kufanyika kwa Tamasha kubwa la musiki kwenye jiji la Johannesburg nchini Afrika kusini ambapo jumla ya watanzania 12 watashinda tiketi za kushudia tamasha hilo litakaloongozwa na mwanamusiki nguli duniani TIMBALAND, Kushoto ni  meneja mawasiliano na habari wa TBL Edith Mushi.

********

 Na Mwandishi Wetu

KAMPUNI ya Bia Tanzania (TBL) kupitia kinywaji chake cha Castle Lite imezindua promosheni maalum, ili kupata watu 12 ambao watakwenda Afrika Kusini kushuhudia onyesho kubwa la msanii maarufu duniani, Timbaland.

Akizungumza na waandishi wa habari jijini Dar es Salaam jana, Meneja Habari na Mawasiliano wa TBL, Edith Mushi alisema, promosheni hiyo itaendeshwa kwa miezi mitatu kuanzia Januari 20 hadi Machi 30, mwaka huu.

Edith alisema, droo ya mwisho inatarajiwa kufanyika Aprili 7 na washindi hao watakwenda katika tamasha hilo kubwa la muziki linalotarajiwa kufanyika Johannesburg, Aprili 26, mwaka huu.

“Kutakuwa na zawadi mbalimbali za kuvutia zitakazotolewa kwa washindi, lakini zawadi kubwa kuliko zote ni ile safari ya kwenda Afrika Kusini kushuhudia tamasha hilo kubwa la muziki.

“Washindi hao 12 watalipiwa gharama zote za usafiri, malazi, chakula na usafiri wa ndani wakiwa Afrika Kusini na mambo yote haya yatafanywa katika kiwango cha hali ya juu, watahudumiwa kama waheshimiwa,” alisema.

Naye Meneja wa Castle Lite, Victoria Kimaro alisema, mteja anatakiwa kununua bia hiyo ya chupa akifungua ataona namba zilizowekwa ndani ya kizibo, atatakiwa kutuma jina lake na namba hiyo kupitia ujumbe mfupi wa simu kwenda kwenye namba 15499.

‘Nawasihi wapenzi wa Castle Lite, kujitokeza kwa wingi kushiriki promosheni hii ya aina yake na kuweza kujishindia zawadi mbalimbali zilizoandaliwa kwa ajili yao hasa zawadi hiyo kubwa ya kwenda kumshuhudia Timbaland.”

Pia aliwaomba wapenzi wa Castle Lite kutembelea ukurasa wa Face Book wa Castle Lite ili kuweza kupata maelezo zaidi ya promosheni hii, ikiwemo vigezo na masharti.

Castle Lite ni kinywaji kinachozalishwa na kusambazwa na Kampuni ya Bia Tanzania (TBL).