MATREKTA YA MWAKYEMBE BADO YANAPETA JIJINI DAR

MNAMO Mwezi Agosti mwaka huu, Waziri wa Uchukuzi Dkt. Harrison Mwakyembe alitoa miezi mitatu kwa watu wote walioingiza matrekta nchini ya kifungu cha msamaha wa kodi ili kuboresha kilimo nchini, wahakikishe zana hizo zinatumika kwa kazi hiyo na siyo vinginevyo.

  

Dkt. Mwakyembe alitoa agizo hilo wakati wa uzinduzi wa Maonesho ya wakulima kwa nyanda za juu kusini katika Viwanja vya John Mwakangale, huku akiagiza tabia ya kutumia matrekta kubeba na kukokota mizigo bandarini ikomeshwe mara moja na matrekta hayo yapelekwe mashambani kwa ajili ya kilimo.

Lakini wakati leo ndio miezi mitatu imetimia tangu agizo hilo litolewe na Waziri huyo mwenye makeke mengi katika utendaji wake wa kazi kiasi cha kuleta ufanisi katika taasisi zilizo chini yake kama bandari na Viwanja vya ndege nchini, inaonesha dhahiri kupuuzwa.

Father Kidevu Blog, inatumia fursa hii kumkumbusha Waziri huyo kuwa agizo lake halijafanyiwa kazi na matrekta hayo yapo na yanaendelea kupeta pasi na shaka katika kubeba mizigo bandarini hata kusafirisha taka kutoka katikati ya mji hadi katika madampo nje ya miji hasa Pugu Kinyamwezi.