Buriani Mhashamu Askofu Balina

 Kanisa katoliki tanzania limepata pigo kwa kifo cha Mhashamu askofu Aloysius Balina (pichani), Askofu wa Shinyanga, kilichotokea katika hospitali ya Bugando jijini Mwanza tarehe 6 Novemba, 2012 saa tano asubuhi. Alikuwa na saratani. 

Mazishi yanatarajiwa kufanyika   Shinyanga Jumamosi tarehe 10 Novemba, 2012. 

 

Mhashamu askofu Aloysius Balina, alizaliwa Juni 21,1945, Ntuzu, Bariadi mkoani Shinyanga, Upadre mwaka 1971 na  alikuwa askofu mwanzilishi wa jimbno la Geita mwaka 1985, na baadaye akateuliwa kuwa askofu wa Shinyanga mwaka 1997. 

 

Kwa zaidi ya miaka 20 amesimamia shughuli za kanisa Katoliki katika idara ya afya, akiwa vile vile mwenyekiti wa bodi ya hospitali ya rufaa ya Bugando. Yeye ndiye mwanzilishi wa Chuo Kikuu cha Tiba cha Bugando.

 

Marehemu  alizaliwa Juni 21,1945, Ntuzu, Bariadi mkoani Shinyanga, Upadre mwaka 1971 na  alikuwa Askofu mwanzilishi wa jimbo la Geita mwaka 1985, na baadaye akateuliwa kuwa askofu wa Shinyanga mwaka 1997. 

 

Kwa zaidi ya miaka 20 amesimamia shughuli za kanisa Katoliki katika idara ya afya, akiwa vile vile mwenyekiti wa bodi ya hospitali ya rufaa ya Bugando. Yeye ndiye mwanzilishi wa Chuo Kikuu cha Tiba cha Bugando.

 

Mhashamu askofu Aloysius Balina enzi za uhai wake akiwa na Rais Jakaya Kikwete katika moja ya shughuli za Hopsitali ya Bugando, Mwanza

Mhashamu askofu Aloysius Balina enzi za uhai akihutubia  

 

Mhashamu askofu Aloysius Balina  akisalimiana na Laurean Kardinal Rugambwa enzi za uhai wao.

 

Rais Kikwete aomboleza

Rais wa Jamhuri ya Muungano wa Tanzania, Mheshimiwa Jakaya Mrisho Kikwete leo, Jumanne, Novemba 6, 2012, amelitumia Kanisa Katoliki Tanzania salamu za rambirambi kuomboleza kifo cha Askofu wa Jimbo Katoliki la Shinyanga, Mhashamu Baba Askofu Aloysius Balina aliyefariki dunia majira ya saa tano asubuhi leo kwenye Hospitali ya Rufaa ya Bugando, Mwanza.

 

Katika salamu zake za rambirambi kwa Rais wa Baraza la Maaskofu Tanzania Mshahamu Baba Askofu Tarcisius Ngalalekumtwa, Rais Kikwete amesema: “Nimepokea kwa mshtuko mkubwa taarifa za kifo cha Mhashamu Baba Askofu Aloysius Balina ambaye nimeambiwa ameaga dunia asubuhi ya leo kwenye Hospitali ya Rufaa ya Buganda, Mwanza, kwa ugonjwa wa kansa.”

 

Amesema Rais Kikwete katika salamu zake hizo: “Mhashamu Baba Askofu Balina alikuwa kiongozi hodari na mwadilifu ambaye siyo tu alichangia kipekee katika mwenendo mzuri wa kiroho wa waumini wa Kanisa Katoliki bali pia katika maendeleo ya Watanzania wote kwa jumla.”

 

“Kifo chake kimetuondolea kiongozi mwema ambaye tutazikosa busara zake na uongozi wake. Lakini napenda kukuhakishia Mshahamu Baba Askofu kuwa sisi ndani ya Serikali tutaendelea kutambua na kuthamini mchango wa Askofu Balina alioutoa kwa nchi yetu katika maisha yake,” amesema Rais Kikwete na kuongeza:

 

“Baba Askofu, nakuomba upokee salamu za rambirambi za Serikali ninayoiongoza na zangu binafsi kufuatia msiba huu mkubwa. Aidha, kupitia kwako, naomba uwafikishie salamu zangu viongozi na waumini wote wa Kanisa Katoliki kwa kuondokewa na kiongozi na muumini mwenzao. Naungana nanyi kumwomba Mwenyezi Mungu, Mwingi wa Rehema, aiweka pema peponi roho ya Marehemu. Amen.”

Imetolewa na:

Kurugenzi ya Mawasiliano ya Rais,

Ikulu.

Dar es Salaam.

6 Novemba, 2012