WANAWAKE TUME YA MADINI WASHIRIKI MAADHIMISHO YA SIKU YA WANAWAKE DUNIANI

Na Mwandishi wetu, Dodoma

Wanawake kutoka Tume ya Madini Makao Makuu pamoja na Ofisi ya Afisa Madini Mkazi Mkoa wa Dodoma wameungana na wanawake wengine duniani kusherehekea maadhimisho ya Siku ya Wanawake Duniani, yaliyofanyika katika Shule ya Msingi Mbande, Wilaya ya Kongwa mkoani Dodoma.

Maadhimisho hayo yamewakutanisha wanawake kutoka taasisi mbalimbali za serikali na binafsi, yakilenga kuadhimisha mchango wa wanawake katika maendeleo ya jamii na taifa kwa ujumla.

Maadhimisho ya mwaka huu yanafanyika chini ya kauli mbiu isemayo: “Haki kwa wanawake na wasichana ni msingi wa maendeleo jumuishi kufikia Dira ya Taifa ya Maendeleo 2050.”

Kauli mbiu hiyo inalenga kuhamasisha jamii kutambua umuhimu wa kuhakikisha wanawake na wasichana wanapata haki na fursa sawa katika elimu, uchumi na uongozi, hatua inayochangia kwa kiasi kikubwa katika kufanikisha maendeleo endelevu ya taifa.

Kupitia maadhimisho hayo, washiriki wamepata fursa ya kujadili namna ya kuendelea kuimarisha usawa wa kijinsia na kuhamasisha jamii kushiriki katika kuondoa vikwazo vinavyoweza kuzuia maendeleo ya wanawake na wasichana nchini.