TBL GROUP KUENDELEA KUWEZESHA VIJANA KUPATA ELIMU YA UFUNDI VETA

Kwangu Kulwa akiwa kazini  katika kiwanda cha TBL Mwanza

                            Mariam Zayumba akiwa kazini katika kiwanda cha TBL Mwanza.

                                                                         **************

 KAMPUNI ya TBL Group imeeleza kuwa itaendelea kuwaunga mkono vijana wa kitanzania kwa kuwawezesha kupata elimu ya ufundi stadi katika vyuo vya VETA kupitia mpango maalumu wa kupata elimu zaidi ya vitendo kuliko nadharia unaojulikana kitaalamu kama Dual Apprenticeship programme

Mpango huu  unaoendeshwa na serikali kupitia taasisi zake za mafunzo ya ufundi kwa kushirikiana na Chama cha Wenye Ujuzi cha Hamburg, Ujerumani umelenga kuwapatia vijana mafunzo ya vitendo ambapo wanasoma wakiwa wanapatiwa mafunzo ya vitendo kwenye viwanda na taasisi mbalimbali.

Meneja wa Mafunzo wa TBL Group ,Gasper Tesha amesema kuwa mpango huu ulioanzishwa miaka 3 iliyopita umeonyesha maendeleo mazuri na makubwa ikiwa ni pamoja na kuwanufaisha vijana hao kiutendaji kazi katika sehemu mbalimbali kutokana na ujuzi waliopatiwa. BOFYA HAPA KUSOMA ZAIDI.

Alisema vijana 4 waliofadhiliwa na kampuni hiyo na kupatiwa mafunzo katika fani ya umeme wa viwandani wameweza kupata maarifa makubwa ya kazi kwa vitendo kwenye kiwanda cha TBL cha Ilala ambapo baada ya kuhitimu masomo  wameweza kuajiriwa na wanaendelea kufanya vizuri.

Tesha alisema kampuni itaendelea kuunga mkono jitihada za serikali za kuwawezesha watanzania wengi kupata ajira na kuwa na maisha bora na ndio maana imeweza kutoa maelfu ya ajira za moja kwa moja na zisizo za moja kwa moja kupitia uwekezaji wake hapa nchini.

“Tutaendelea kuwafadhili vijana na kushiriki kuwapatia mafunzo ya vitendo kupitia mpango huu kama ambavyo tumekuwa tukifanya kazi na makundi mbalimbali na kuyapatia ujuzi na kuyawezesha kujiajiri mfano wakulima wa Shahiri na zabibu tunaoshirikiana nao katika utekelezaji wa mpango wetu wa Go Farming”Alisema.

Baadhi  ya wahitimu wa mafunzo haya ambao wamefadhiliwa na TBL Group na kupata ajira za kudumu baada ya mafunzo wamesema mpango huu ni mzuri na wa aina yake ambao ukiungwa mkono utawezesha Tanzania kuwa na mafundi wazuri wenye ujuzi mkubwa.

Mariam Zayumba ambaye anafanya kazi katika kiwanda cha TBL cha Mwanza alisema kuwa hivi sasa yeye ni fundi mzuri wa umeme wa majumbani na viwandani  na anashukuru kupata mafunzo ya vitendo kwenye kampuni ambayo imemuajiri kwa hivi sasa ya TBL Group kwa kuwa inavyo vifaa vya kisasa vya kujifunzia na wataalamu waliobobea katika fani yake ya umeme ambao wamemfundisha  na anajiamini kuwa ni fundi mzuri wa umeme.

Naye Kwangu Kulwa  ambaye naye  anafanyia kazi katika kiwanda cha  TBL cha Mwanza anasema kuwa mpango huu  wa Dual Apprenticeship Training unamwezesha mtu kupata ujuzi wa fani husika wakati anafanya kazi kwenye kiwanda hivyo kumuwezesha kwa kiasi kikubwa kujifunza zaidi kwa vitendo na kuendana na mahitaji ya soko la ajira pmaoja na kupata uzoefu na uelewa wa mazingira halisi ya kufanyia kazi.

Alitoa wito kwa vijana wenzake kujitosa zaidi katika fani ya ufundi kwa kuwa kwa kiasi kikubwa inawawezesha kujipatia fursa za kujiajiri badala ya kukata tamaa na kushinda wanalalamika kuwa hakuna ajira. “Nashukuru kwa kupata fursa ya kufanya kazi kwenye kampuni hii na nimeweza kujifunza mambo mengi hususani utumiaji wa zana za kisasa katika fani ya umeme”.